Emprezáriu lokál Kovalima preokupa folin simentu sa’e ba $7
KOVALIMA, 29 Setembru 2026 (TATOLI) – Emprezáriu lokál sira ne’ebé implementa projetu Planu Dezenvolvimentu Integradu Munisipál (PDIM) preokupa ho folin simentu ne’ebé sa’e maka’as iha Munisípiu Kovalima, husi $4,50 ba $7.
Emprezáriu lokál husi Empreza Futuru Mane Mesak, Yuliana Inosensia Justina Hoar, hateten katak aumentu folin simentu fó impaktu ba implementasaun projetu sira tanba iha tempu halo negosiasaun bazeia ba BOQ, folin simentu sei iha $4,50.
“Ha’u sente triste tebes tanba folin simentu sa’e makaas ne’e fó impaktu ba implementasaun projetu. Iha momentu halo negosiasaun ba BOQ, folin simentu sei $4,50, maibé agora simentu sa’e $ 7.00 no ami la hatene razaun,” nia hateten ba jornalista sira iha Kovalima.
Nia husu Governu atu haree situasaun aumentu folin simentu ne’e tanba bele fó impaktu ba sustentabilidade empreza lokál sira no bele halo implementasaun projetu sira para.
Empreza lokál sira implementa projetu Planu Dezenvolvimentu Integradu Munisipál (PDIM) la’o hela ida-ne’e sai paradu ho situasaun folin sumenti dafaun ne’e
Iha fatin hanesan, Na’in Empreza Loro Nabilan, Rude de Sousa, dehan aumentu folin simentu mós fó impaktu ba empreza lokál sira ne’ebé implementa projetu PDIM.
Nia hateten katak, depois de lansamentu projetu ponte Bakula, folin simentu ne’ebé antes $4,50 sa’e ba $7.
Atu implementa projetu PDIM, empreza lokál sira sosa simentu iha Dili ho folin besik $4,40 kada saku. Maibé, tanba tenke lori husi Dili mai Suai, loja sira fa’an fali ho folin entre $6 to’o $7 kada saku.
Responde kestaun ne’e, Na’in ba loja, Dulce Maria Lay, esplika katak aumentu folin simentu akontese tanba sosa iha Dili ho folin $4,40 no tenke aumenta kustu transporte no selu traballadór sira ne’ebé hatún simentu.
“Ho folin simentu sa’e, ami mós preokupa tebes tanba komunidade sira husu ami atu hatún folin simentu. Maibé ami mós hetan lukru ki’ik liu,” nia dehan.
Bazeia ba observasaun husi jornalista TATOLI nota katak,Simentu ho marka tonasa loja sira balun faan 6,50 balun faan ho $7.00 no iha postu administrativu sira faan ho folin $8,75.
Jornalista: Celestina Teles
Editór: Florencio Miranda Ximenes
