INCSIDA no KPA Kupang hametin kooperasaun ba prevensaun HIV/SIDA
DÍLI, 29 Setembru 2026 (TATOLI) — Institutu Nasionál Kombate HIV/SIDA, Institutu Públiku (INCSIDA, I.P-sigla Portugés), kontinua servisu hamutuk ho Komisi Penanggulangan AIDS (KPA) Kupang, Indonézia, hodi hametin esforsu kolletivu ba prevensaun no kombate HIV/SIDA.
Prezidente INCSIDA, IP, Daniel Marçal, hatete katak kooperasaun ho KPA Kupang importante tebes atu fahe esperiénsia, koñesimentu no prátika di’ak kona-ba prevensaun HIV/SIDA, liuliu iha área edukasaun, sensibilizasaun no promosaun saúde públika.
Daniel Marçal fó sai deklarasaun ne’e iha edifísiu INCSIDA, IP, Díli, Tersa ne’e.
Tuir nia, servisu hamutuk entre INCSIDA, IP no KPA Kupang bele sai oportunidade importante atu hametin kooperasaun institusionál iha prevensaun HIV/SIDA, tanba Timor-Leste no Indonézia iha relasaun no interasaun populasaun ne’ebé di’ak no besik.
Kooperasaun ne’e bele asegura katak sidadaun husi nasaun rua bele hetan diagnóstiku no tratamentu antirretrovirál kontinuidade, ne’ebé la haree ba sira-nia estatutu rezidénsia.
Kooperasaun ne’e mós fasilita fahe koñesimentu bamalu kona-ba konseitu, estratéjia no métodu diagnóstiku ne’ebé avansadu.
“Kooperasaun ne’e mós iha objetivu atu fasilita asesu ba sidadaun husi nasaun rua ne’ebé moris ho HIV, atu sira bele kontinua hetan tratamentu no servisu saúde apropriadu iha Timor-Leste no Kupang bainhira sira halo viajen entre nasaun rua,” nia deahn.
INCSIDA, IP kontinua halo esforsu atu hasa’e sensibilizasaun públiku kona-ba importánsia prevensaun HIV/SIDA, inklui hasa’e koñesimentu no konsiénsia komunidade kona-ba risku transmisaun HIV no nesesidade atu asesu ba informasaun no servisu saúde ne’ebé apropriadu.
Jornalista: Camilio de Sousa
Editór: Filomeno Martins
