Konstrusaun eskada asesu bá Sítiu Turístiku Ue-tasi Lakluta hahú ona
VIKEKE, 29 Setembru 2026 (TATOLI)—Xefe Suku Ahik, Postu Administrativu Lakluta, Munisípiu Vikeke, Ercílio Soares, informa hahú ona konstrusaun eskada atu asesu ba Sítiu Turizmu Ue-tasi ne’ebé lokaliza iha Suku Ahik husi obra Planu Dezenvolvimentu Integradu Munisipál (PDIM) 2026.
“Kona-ba konstrusaun eskada liga bá área sítiu turizmu iha ami-nia suku ne’e agora daudaun ita-nia empreza responsável hatama ona materiál kontrusaun iha servisu fatin hodi komesa ke’e alsesu eskada,” Ercílio ba TATOLI iha Postu Lakluta, Tersa ne’e.
“Servisu ne’ebé la’o mak foin ke’e dalan tanba iha item servisu ne’e dalan kilo rua ho luhan metru lima (5), inklui eskada sa’e ba Ue-tasi. Ami autoridade sira sempre akompaña servisu sira-ne’ebé implementa iha Suku Ahik”. Ercílio hato’o.
Nia esplika obra ne’e sei benefísia populasuan Ahik inklui mós populasaun Postu Lakluta tanba vizitante lokál no nasionál bainhira bá vizita fatin turizmu Ue-tasi sei sosa populasaun sira-nia produtu lokál sira.
Sítiu Ue-tasi mak hanesan fatin turizmu naturál ka bee-tasi/mota ne’ebé lokaliza iha Suku Ahik, nu’udár fatin ne’ebé koñesidu ho nia paizajen foho nian ne’ebé matak, anin malirin, no mós bee-lihun naturál sira-ne’ebé furak tebes ba vizitante sira atu bá hariis ka refreska an.
Tuir dadus, populasaun Suku Ahik hamutuk 1.247, aldeia hamutuk lima hanesan Krarek-Boku, Hali-Oan, Hali-Mean, Ai-lo’ok no Kai-Wa.
Projetu konstrusaun konstrusaun fatin turizmu ne’e gasta Orsamentu Jerál Estadu (OJE) ne’ebé aloka ba Autoridade Munisípiu Vikeke ba tinan 2026 ho montante $148.009,99, responsabiliza husi Emprezaa Jemalo Circle Arh Engineering (JCAE), Lda, durasaun servisu fulan neen (6).
Jornalista: Vitorino Lopes da Costa
Editór: Xisto Freitas da Piedade
