ADTL ho parseiru kontinua hametin advokasia no inkluzaun ba EhD
DILI, 29 Setembru 2026 (TATOLI)—Asosiasaun Defisiente Timor-Leste (ADTL), Tersa ne’e, realiza enkontru trimestrál ho membru sira ho tema “ADTL no Membru Hamutuk Partilla Servisu, Aprende ba Malu no Hametin Advokasia no Referrál ba Ema ho Defisiénsia iha Timor-Leste”, iha Salaun João Paulo II, Komoro.
Prezidente Konsellu Fiskál ADTL, Crecencia Madeira de Deus, hatete enkontru ohin ne’e importante hodi fahe informasaun, aprende husi esperiénsia ba malu, no identifika dezafiu sira atu buka solusaun hamutuk hodi hadi’a servisu ba Ema ho Defisiénsia (EhD) iha Timor-Leste.
“Ita hotu hatene katak servisu ba ema ho defisiénsia presiza kolaborasaun husi organizasaun idaidak, atu ita bele fahe esperiénsia no área servisu diferente. Bainhira ita fahe esperiénsia no rekursu, ita bele hametin resposta ba nesesidade ema ho defisiénsia iha Timor-Leste,” Crecencia Madeira de Deus tenik iha nia diskursu.
Nia hateten advokasia sai parte importante hodi hato’o lian kona-ba direitu, asesibilidade, edukasaun inkluziva, saúde, empregu, protesaun sosiál no partisipasaun iha prosesu foti desizaun.
“Ema ho defisiénsia nia lian tenke rona, nia opiniaun tenke konsidera, no nia partisipasaun tenke efetiva iha desizaun sira-ne’ebé afeta sira-nia moris,” nia dehan.
Crecencia mós subliña katak sistema referrál ne’ebé di’ak bele ajuda ema ho defisiénsia atu hetan apoiu no servisu nesesáriu iha tempu apropriadu.
Iha oportunidade hanesan, Diretór Ezekutivu ADTL, Cesário da Silva, informa katak enkontru sai espasu ba membru sira atu fahe esperiénsia kona-ba sistema referrál, asesu ba dokumentu legál, edukasaun inkluziva no reabilitasaun.
Cesário esplika membru sira husi organizasaun oioin servisu ba ema ho tipu defisiénsia diferente, inklui akompañamentu ba ema ho defisiénsia hodi hetan dokumentu importante hanesan kartaun, sertidaun moris no pasaporte.
“Bainhira seidauk iha dokumentu, bele envolve autoridade komunitária hodi fasilita prosesu,” Cesário haktuir.
Nia hatutan ADTL mós fó-atensaun ba kapasitasaun joven ho defisiénsia, inklui formasaun kona-ba interpretasaun no tradusaun, atu sira bele partisipa ativamente iha prosesu dezenvolvimentu polítika inkluziva.
“ADTL nafatin fó espasu ba ema ho defisiénsia atubele partisipa iha formasaun oioin, nune’e bele aumenta sira-nia koñesimentu, liuliu kona-ba prosesu foti desizaun,” nia hateten.
Austrália apoia inkluzaun EhD
Reprezentante Embaixada Austrália, iha Timor-Leste, Lauren Minson, apresia ADTL tanba realiza enkontru ne’e, ne’ebé konsidera hanesan oportunidade atu partilla koñesimentu, aprende husi esperiénsia ba malu no hametin parseria.
“Enkontru ne’e oportunidade importante atu partilla koñesimentu, aprende husi esperiénsia ba malu no hametin parseria hodi kontribui ba mudansa pozitiva iha direitu no inkluzaun ema ho defisiénsia,” Lauren Minson haklaken.
Nia hateten Austrália komprometida atu kontinua servisu hamutuk ho organizasaun defisiénsia iha Timor-Leste, bazeia ba prinsípiu katak ema ho defisiénsia tenke hetan oportunidade másima atu partisipa no hetan tratamentu ho iguál.
“Ami-nia ambisaun la’ós de’it apoia projetu sira, maibé apoia movimentu defisiénsia ida-ne’ebé hamutuk no sustentável, ne’ebé bele lori mudansa ba futuru,” Lauren dehan.
Lauren Minson mós subliña katak feto no labarik-feto ho defisiénsia hasoru barreira adisionál, tanba ne’e sira-nia perspetiva presiza konsidera iha formulasaun polítika, prestasaun servisu no advokasia, atubele atinje inkluzaun ne’ebé efetiva.
Jornalista: Osória Marques
Editór: Xisto Freitas da Piedade
