Pham Binh Dam nu’udar Embaixadór Vietname foun iha Timor-Leste
DILI, 29 Setembru 2026 (TATOLI) – Embaixadór Vietname iha Timor-Leste, Pham Binh Dam, tersa ne’e, entrega karta kredensiál ba Prezidente Repúblika, José Ramos-Horta, iha Palásiu Prezidensiál Nicolau Lobato, Dili.
Durante serimónia, Ramos-Horta hatoo boas vindas ba representante Governu Vietname iha Timor-Leste no destaka importánsia reforsu parseria entre nasaun-rua.
“Akreditasaun Embaixadór primeiru rezidente husi Vietname iha Timor-Leste demonstra fortalesimentu ita nia relasaun no ita nia vizaun partillada ba futuru,” hateten Xefe Estadu.
Nune’e mós Vise-Ministra Negósiu Estranjeiru no Kooperasaun, Jesuína Gomes, hatete, Timor-Leste ho Vietname estabelese ona relasaun diplomátika dezde 2002 no iha tinan oin sei selebra tinan 25.
“Ohin Embaixadór foun husi Vietname, Pham Binh Dam, mai entrega karta kredensiál ba Prezidente Repúblika, sai hanesan Embaixadór primeiru rezidente ba Timor-Leste,” governante hateten ba jornalista sira hafoin serimónia entrega karta kredensiál.
Nia esplika, antes ne’e Embaixada Vietname iha Indonézia maka akumula misaun la rezidente ba Timor-Leste. “Iha enkontru ne’e Prezidente Repúblika agradese Embaixadór, liuliu ba Governu Vietname, ba sira-nia apoiu ba Timor-Leste nia integrasaun ba membru ASEAN. Agradese mós Vietname, tanba sira-nia apoiu ne’ebé sei fó nafatin, liuliu ba preparasaun Timor-Leste nian atu sai prezidénsia ASEAN iha 2029,” nia hateten.
Tuir Vise-Ministra, misaun diplomátika Vietname nian loke Embaixada iha Timor-Leste foin iha tinan ne’e, hahú iha fulan-abríl no inaugura iha fulan-jullu.
Nia akresenta, iha fulan-juñu tinan 2026, Primeiru-Ministru, Kay Rala Xanana Gusmão, halo vizita ofisiál ba Vietname no asina akordu balun, hanesan akordu izensaun vistu ba pasaporte komum nomos formalizasaun akordu ida entre Ajénsia Notisioza Vietmane no Ajénsia Notisioza Timor-Leste, TATOLI.I.P.
Nia hateten, kooperasaun bilaterál entre Timor-Leste ho Vietname iha futuru sei habelar tan ba área saúde, infraestrutura, negósiu no agrikultura.
Jornalista: Hortêncio Sanchez
Editora: Julia Chatarina
