SEFOPE atribui sertifikadu lian inglés ba formandu programa PALM na’in-279
DÍLI, 29 Setembru 2026 (TATOLI) — Sekretária Estadu Formasaun Profisionál no Empregu (SEFOPE) atribui sertifikadu lian Inglés ba kandidatu programa Pacific Australia Labour Mobility (PALM) na’in-279 husi Munisípiu Díli.
Antes ne’e, kandidatu na’in-279 ne’e partisipa ona iha teste selesaun ba Programa PALM, maibé hetan valór menus husi 49, ne’ebé kategoriza tama iha klasifikasaun very poor, poor no sufficient.
Tanba hetan valór ki’ik iha teste lian Inglés, kandidatu sira ne’e tenke partisipa iha programa formasaun lian Inglés ho durasaun fulan tolu atu hadi’a sira-nia abilidade Inglés.
Formasaun ne’e hahú husi Setembru to’o Dezembru 2025, ho objetivu atu hadi’a sira-nia kapasidade no valór iha lian Inglés antes kontinua ba prosesu tuirmai hodi hetan oportunidade ba servisu iha Austrália.
Relembra katak, antes ne’e, husi totál kandidatu na’in-8,344 ne’ebé konkore ba vaga Programa PALM, kandidatu na’in-5,827 husi territóriu nasionál mak hetan valór ki’ik, tanba ne’e presiza hadi’a liután sira-nia abilidade lian Inglés.
Sekretáriu Estadu Formasaun Profisionál no Empregu, Rogério Araújo Mendonça, hateten katak formasaun ne’e importante atu ajuda kandidatu sira ne’ebé antes ne’e hetan valór ki’ik iha teste lian Inglés.
“Tanba ne’e SEFOPE kontinua iha polítika atu bele fasilita nafatin formasaun ba joventude sira atu hetan oportunidade hanesan ho traballadór timoroan sira seluk ne’ebé ba ona servisu iha rai-li’ur”, Rogério ba jornalista sira iha salaun E-STV Bekora, ohin.
Nia hateten katak formandu sira hetan kapasitasaun husi Governu Timor-Leste liuhusi parseria ho Governu Austrália atu hasa’e nivel koñesimentu lian Inglés, ne’ebé bele ajuda sira iha prosesu entrevista ho empregadór sira husi Programa PALM.
Nia dehan kapasitasaun koñesimentu lian ne’e la’ós de’it iha munisípiu Dili maibé mós sei implementa iha munsípiu hotu ba kandidatu sira ne’ebé hetan valór kiik liu.
Prezidente Autoridade Munisípiu Díli, Francisco dos Santos, hato’o apresiasaun ba SEFOPE tanba kontinua esforsu atu buka meius hodi responde ba problema juventude iha territóriu, liuliu kona-ba falta oportunidade empregu.
“Hanesan autoridade munisípiu Díli sempre apoiu 100% ba atividade saida de’it mak halo hodi bele rezolve problema liuliu kria kampu traballu”, PAM relata.
Nia hateten katak formasaun ne’e fó oportunidade ba formandu sira atu kompleta kursu lian Inglés no hetan sertifikadu.
Maibé, Francisco hateten sertifikadu ne’e la’ós de’it sai sasukat ba kapasidade sira, maibé importante liu mak oinsá sira kontinua hasa’e kapasidade.
Reprezentante formandu, Carla Mouzinho Araújo, hato’o agradesimentu ba Governu, liuliu SEFOPE, tanba fó oportunidade ba sira atu hadi’a sira-nia kapasidade no abilidade iha lian Inglés.
“Ami agradese ba lideransa SEFOPE tanba fó oportunidade valioza ida-ne’e mai ami. Liuhusi programa ida-ne’e ajuda ami atu hadi’a ami-nia kapasidade no abilidade iha lian Inglés, no nune’e aumenta ami-nia koñesimentu no dezenvolvimentu pesoál”, Formandu ne’e dehan.
Nia mós hato’o agradesimentu ba formadór sira ne’ebé fó tempu hodi hanorin formandu sira durante períodu aprendizajen fulan tolu.
“Ami-nia apresiasaun boot liu ba formadór no mestra sira-ne’ebé ho dedikasaun, paisaun no kompromisu boot halo ami-nia viajen aprendizajen sai signifikativu no susesu. Ami orgullu tanba ami konsege kompleta prosesu aprendizajen fulan tolu-ne’e ho di’ak tebes”, tenik nia.
Nia mós apela ba kandidatu sira hotu atu aplika koñesimentu no kapasidade ne’ebé sira hetan durante formasaun, hodi harii futuru ne’ebé di’ak liu ba sira-nia an rasik no ba Timor-Leste.
Jornalista: Alexandra da Costa
Editór: Filomeno Martins
