Veterináriu Vikeke rejista kazu asu pozitivu raiva sa’e bá 22
VIKEKE, 29 Setembru 2026 (TATOLI)—Xefe Departamentu Veterináriu Servisu Ministériu Agrikultura, Peska, Pekuária no Floresta (SMAPPF) Munisípiu Vikeke, Domingos do Carmo Pinto, relata Departamentu Veterináriu Munisípiu Vikeke rejista kazu asu pozitivu vírus raiva sa’e bá 22.
“Iha semana ikus fulan-Setembru ida-ne’e kazu asu pozitivu raiva rejistadu hamutuk 22. Husi kazu ne’e, ita-nia tékniku sira kontinua esforsu halo vasina prevene kontra vírus raiva iha Munisípiu Vikeke,” Domingos do Carmo Pinto ba TATOLI iha Postu Vikeke Vila, Tersa ne’e.
Domingos hatutan antes ne’e kazu raiva rejistadu de’it iha postu tolu (3) hanesan Vikeke Vila, Postu Uatulari, Ossú maibé horisehik rejista tan kazu rua husi Lakluta.
Kona-ba prevensaun, nia dehan, daudaun ne’e tékniku veterináriu sira kontinua tun ba área afetada sira hodi fó vasina ba komunidade nia asu.
Nia husu komunidade Munisípiu Vikeke bainhira la’o tenke kuidadu an ba asu sira tanba kazu asu pozitivu ba vírus raiva ne’e sa’e beibeik ona.
Tuir dadus, kazu asu pozitivu raiva ne’ebé rejistadu iha Munisípiu Vikeke totál atuál 22, kompostu husi Postu Vikeke Vila 17, Uatulari rua (2), Ossú ida (1) no Postu Lakluta rua (2).
Jornalista: Vitorino Lopes da Costa
Editór: Xisto Freitas da Piedade
