Eskritóriu KOICA Timor-Leste realiza ho susesu “FESTA KOREA: KOICA ho Ita”
DILI, 30 Setembru 2026 (TATOLI) – Eskritóriu Ajénsia Kooperasaun Internasionál Korea nian (KOICA, sigla inglés) iha Timor-Leste realiza ho susesu eventu “KOREA FESTA: KOICA ho Ita (KOICA is with you)” iha Sentru Kulturál Fundasaun Oriente, Dili, hodi aprezenta kultura Korea no atividade kooperasaun dezenvolvimentu KOICA nian.
Objetivu husi eventu ne’e jametin amizade entre Korea no Timor-Leste liuhosi kultura Korea no kooperasaun dezenvolvimentu.
Partisipante lokál hamutuk ema na’in-200, komposta husi labarik, joven to’o ema boot sira, partisipa iha eventu ne’e no esperiénsia diretamente kultura Korea no atividade kooperasaun dezenvolvimentu KOICA nian.
Nota imprensa ne’ebé Ajénsia TATOLI, asesa eventu ne’e organiza atu aprezenta KOICA no kultura Korea ba povu Timor-Leste ho maneira ne’ebé fasil no atrativu, no atu hametin liután amizade no interkámbiu kulturál entre Korea no Timor-Leste. Liuliu, eventu ne’e kombina tradisaun loron-festa Korea nian ho atividade interativu oioin no konteúdu promosaun KOICA, hodi fó oportunidade ba partisipante sira atu koñese kultura Korea no valór kooperasaun dezenvolvimentu internasionál ho maneira naturál.
Eventu hahú ho liafuan kongratulasaun husi Embaixador Repúblika Korea nian ba Timor-Leste, Chang Ha-yeon, no kontinua ho programa oioin, inklui atividade kultura tradisionál Korea, espetákulu K-POP, promosaun KOICA no baraka sira ne’ebe nakonu ho esperiénsia kultura Korea.
Parte ida ne’ebé sai hanesan destake iha eventu ne’e mak programa misaun interativu, ne’ebé partisipante sira sai hanesan “PeKO”, KOICA nia karáter reprezentativu, no haleu fatin eventu atu esperiénsia diretamente KOICA nia valór prinsipál 5P: Peace (Dame), Planet (Planeta), People (Ema), Partnership (Parseria) no Prosperity (Prosperidade).
Programa ne’e enkoraja partisipasaun ativa no ajuda partisipante sira atu komprende KOICA nia valór sira ho maneira ne’ebé atrativu.
Bainhira tama iha fatin eventu ne’e, partisipante sira simu “Pasaporte KOICA” no vizita baraka ida-idak ne’ebé reprezenta valór 5P. Iha barraka sira ne’e, partisipante sira kompleta misaun no halibur karimbu.
Iha barraka “Peace”, partisipante sira aprende kona-ba atividade prinsipál kooperasaun dezenvolvimentu no rezultadu projetu Eskritóriu KOICA Timor-Leste nian liuhosi fotografia, materiál promosaun no quiz kona-ba ODA no Korea.
Iha barraka “Planet”, partisipante sira koko misutgaru, bebida tradisionál Korea ne’ebé halo husi mistura sereál, no aprende kona-ba valor hahán sustentável no konsiénsia ambientál.
Iha barraka “People”, partisipante sira hasai fotografia hamutuk hodi rai memória espesiál husi eventu.
Iha baraka “Partnership”, sira esperiénsia diretamente jogu tradisionál Korea hanesan tuho, jegichagi no biseokchigi, hodi fó oportunidade ba sira atu koñese kultura Korea besik liután.
Iha barraka “Prosperity”, partisipante sira hakerek sira-nia esperansa no mehi kona-ba “Timor-Leste iha tinan 10 oinmai” no tau iha “Timor-Leste Peace Wall”. Liuhosi atividade ne’e, partisipante sira fahe sira-nia hanoin no esperansa kona-ba dezenvolvimentu sustentável no prosperiedade futuru Timor-Leste nian.
Eventu ne’e mós inklui atividade hakerek naran rasik ho alfabetu lian Korea, Hangul, no espetákulu K-POP, ne’ebé aumenta liután interese no entuziazmu partisipante lokál sira ba kultura Korea.
Voluntáriu KOICA WFK (World Friends Korea) sira mós partisipa iha operasaun programa, halo interasaun diretamente ho partisipante sira no hametin liután signifikadu interkámbiu kulturál entre nasaun rua.
“FESTA KOREA: KOICA ho Ita” la’ós de’it eventu atu aprezenta kultura Korea, maibé mós sai hanesan espasu komunikasaun ne’ebé fó oportunidade ba komunidade lokál atu haree, rona no esperiénsia diretamente valór kooperasaun dezenvolvimentu ne’ebé KOICA promove, hamutuk ho atividade oioin ne’ebé KOICA implementa iha Timor-Leste.
Eskritóriu KOICA Timor-Leste sei kontinua habelar komunikasaun no envolvimentu ho komunidade lokál, no kria oportunidade oioin atu povu Korea no Timor-Leste bele komprende malu di’akliu kona-ba kultura no fahe hamutuk valór kooperasaun dezenvolvimentu.
TATOLI
