Expedito: Governu respeita independénsia mídia no liberdade jornalista
DILI, 30 Setembru 2026 (TATOLI)—Sekretáriu Estadu Komunikasaun Sosiál, Expedito Loro Dias Ximenes, hateten Governu respeita independénsia mídia, liberdade jornalista sira no prinsipiu jornalístiku.
“Governu fó-atensaun ba komunikasaun no jornalizmu, tanba jornalista sira sai ponte entre Governu, instituisaun no komunidade. Liuhusi mídia, informasaun kona-ba realidade povu bele to’o bá públiku, nune’e preokupasaun komunidade nian bele hetan atensaun husi instituisaun kompetente. Tanba ne’e, iha apoiu husi Governu la signifika intervensaun ba polítika editoriál,” Expedito ba jornalista sira liuhusi nia diskurus iha ámbitu despedia asosiasaun jornalista ba atividade Mídia Tour ne’ebé atu selebra Loron Nasionál Liberdade Imprensa, iha Palásiu Governu, Kuarta ne’e.
Mídia Tour ne’e hetan apoiu husi Sekretaria Estadu Komunikasaun Sosiál (SEKOMS) ne’ebé lori jornalista sira ba área fronteira no rurál, atu hakbesik komunidade no hatudu realidade lokál ba públiku.
Iha biban ne’e, governante ne’e mós hateten Intelijénsia Artifisiál (AI-sigla portugeza) fó benefísiu ba jornalista, maibé iha mos risku ne’ebé presiza komprende no jere ho responsabilidade.
“Ha’u husu atu uza mídia sosiál no plataforma dijitál ho responsabilidade, ho informasaun bazeia ba faktu, verifikasaun no étika jornalístika,” nia relata.
Iha fatin hanesan, Prezidente Uniaun Profisaun Jornalista Timor-Leste (UPJTL), Horácio Babo, hateten organizasaun jornalista haat sei hala’o Mídia Tour ne’ebé hetan apoiu husi Governu.
“Organizasaun hirak-ne’e hanesan UPJTL, AJTL, TLPU no ARCTL, iha-ne’ebé atividade sei konsentra liuliu iha área fronteira no rurál. Mídia Tour sei aprosima jornalista sira ho komunidade atu haree diretamente situasaun no realidade lokál,” nia subliña.
Nia esplika durante atividade Mídia Tour ne’e jornalista sira sei halo interasaun no sosializasaun ho lideransa lokál, funsionáriu públiku no komunidade.
Nia hatutan jornalista sira mós sei halo kobertura kona-ba atividade sosiál, dezenvolvimentu no dezafiu ne’ebé komunidade enfrenta iha área rurál.
“Ami hakarak média sai ponte entre komunidade, instituisaun públika no públiku,” nia hatutan.
Atividade ne’e sei inklui jornalista hamutuk sanulu (10) hosi mídia online, imprensa, televizaun no rádiu, ne’ebé sei hala’o kobertura durante Mídia Tour ne’e.
“Ita-nia jornalista sira mós sei sosializa literasia mídia ba komunidade no funsionáriu, inklui asesu, uza no fahe informasaun ho responsabilidade,” nia hateten.
Iha parte seluk, Prezidente Asosiasaun Jornalista Timor Lorosa’e (AJTL), Zevónia Vieira, hateten atividade Mídia Tour ne’e sei lori jornalista sira bá Munisípiu Bobonaru, Oekusi no Kovalima, iha-ne’ebé atividade ne’e sei fó-atensaun ba preokupasaun komunidade iha fronteira, inklui edukasaun, saúde no asesu ba servisu públiku.
AJTL mós sei hala’o sosializasaun kona-ba seguransa dijitál ba joven no estudante sira, liuliu iha Munisípiu Bobonaru.
Nia afirma atividade Mídia Tour ne’e realiza nu’udár parte husi Komemorasaun Loron Liberdade Imprensa, ne’ebé sei komemora iha loron 16 Outubru tinan ne’e.
Jornalista: Felicidade Ximenes
Editór: Xisto Freitas da Piedade
