Governu apoia relatóriu RPU Timor-Leste kona-ba direitus umanus
DÍLI, 30 Setembru 2026 (TATOLI) — Governu liuhosi sorumutu Konsellu Ministru ohin, delibera hodi apoia Relatóriu Estadu Timor-Leste kona-ba Revizaun Periódika Universál (RPU) 2022–2026, iha área direitus umanus.
Relatóriu ne’e aprezenta husi Ministru Justisa, Sérgio de Jesus Fernandes da Costa Hornai.
Relatóriu ne’e deskreve progresu prinsipál sira ne’ebé Timor-Leste alkansa iha área direitus umanus durante períodu 2022–2026.
Dokumentu ne’e mós deskreve medida sira ne’ebé Governu adota atu halo akompañamentu ba rekomendasaun sira ne’ebé Timor-Leste simu iha siklu Revizaun Periódika Universál anteriór.
Relatóriu Estadu ne’e sei submete ba Nasaun Unida iha loron 9 fulan-Outubru 2026, nu’udar parte ida husi mekanizmu Direitus Umanus Nasaun Unida nian, ne’ebé hala’o avaliasaun periódika ba situasaun direitus umanus iha nasaun membru sira.
Revizaun Periódika Universál (RPU) mak mekanizmu Nasaun Unida nian atu halo revizaun ba situasaun direitus umanus iha nasaun membru sira no avalia progresu sira ne’ebé tama iha implementasaun rekomendasaun direitus umanus.
Ministru Justisa, Sérgio de Jesus Fernandes da Costa Hornai, hateten katak relatóriu ne’e aprezenta avaliasaun kona-ba situasaun direitus umanus iha Timor-Leste.
Nia haktuir katak iha prosesu ne’e, Governu halo avaliasaun balun ne’ebé envolve liña ministeriál sira, atu diskute kona-ba partisipasaun Timor-Leste iha atividade sira ne’ebé promove no asegura direitus umanus, liuliu garantia ba liberdade sidadaun sira iha modalidade hotu.
Jornalista: Alexandra da Costa
Editór: Filomeno Martins
