Governu aprova nomeasaun membru Konsellu Fiskál BTL ba mandatu tinan haat

DÍLI, 30 Setembru 2026 (TATOLI) — Konsellu Ministru, ohin, aprova projetu Rezolusaun Governu hodi nomeia membru Konsellu Fiskál Bee Timor-Leste, E.P. (BTL, E.P.) na’in-tolu ba mandatu tinan haat.

Tuir proposta konjunta husi membru Governu sira ne’ebé responsavel ba setór bee no saneamentu no mós finansas, João Amaral hetan nomeasaun nu’udar Prezidente Konsellu Fiskál, no Francisco da Conceição Guterres no Ângelo Barreto hetan nomeasaun nu’udar vogál. 

Nomeasaun ne’e bazeia ba sira ida-idak nia abilidade pesoál no profisionál, no mós idoneidade, izensaun, imparsialidade no esperiénsia ne’ebé presiza hodi hala’o knaar ne’ebé sira simu.

Sekretáriu Estadu Komunikasaun Sosiál, Expedito Loro Dias Ximenes, hateten katak aprovasaun ne’e bazeia ba proposta ne’ebé aprezenta husi Vise-Ministra Finansas, Regina de Jesus.

Konsellu Fiskál BTL iha papel importante atu hala’o fiskalizasaun no akompañamentu ba jestaun empresa, liuliu iha aspetu administrativu no finanseiru, tuir kompeténsia ne’ebé determina iha regra sira ne’ebé vigora.

Jornalista: Alexandra da Costa
Editór: Filomeno Martins