Governu autoriza miliaun $36-resin ba implementasaun Projetu Tasi Mane
DÍLI, 30 Setembru 2026 (TATOLI) — Governu liuhosi sorumutu Konsellu Ministrus ohin, autoriza despeza fundu hosi Orsamentu Jerál Estadu, iha ámbitu Programa A18 ba implementasaun Projetu Tasi Mane iha Kosta Súl, ho montante miliaun $22,84. Enkuantu, governu mós aprova alokasaun miliaun $13,57 ba abertura ninia prosedimentu aprovizionamentu liuhosi konkursu públiku.
Desizaun ne’e bazeia ba projetu sira ne’ebé aprezenta husi Ministru Petróleu no Rekursu Minerais, Francisco da Costa Monteiro.
Despeza sira ne’e destina ba kontratasaun servisu jestaun no supervizaun projetu, ne’ebé inklui Suai Supply Base no Sentru Exelénsia iha Siénsia no Teknolojia Petróleu no Gás, no mós obra auto-estrada entre Zumalai no Natarbora, iha seksaun Uma Berloik–Natarbora, no estrada ligasaun entre auto-estrada ne’e ho área parke industriál.
Implementasaun projetu hirak-ne’e nu’udar parte husi esforsu Governu atu dezenvolve infraestrutura no suporta atividade sira relasiona ho setór petróleu no gás iha Kosta Súl.
Jornalista: Alexandra da Costa
Editór: Filomeno Martins
