Inséndiu estraga uma rua iha Uaisá

BAUKAU, 30 Setembru 2026 (TATOLI)—Inséndiu ida akontese iha Kuarta ne’e estraga uma rua iha área Uaisá, Aldeia Ossoua, Suku Triloka, Postu Administrativu Baukau Vila.

Dezastre ne’e akontese purvolta tuku 15:00-resin Otl, rezulta uma-rua mutuk totál inklui sasán no ekipamentu uma-laran la salva, rezulta feto ida mós hetan kanek iha liman bainhira atu salva nia sasán.

“Ita-nia ekipa Bombeiru to’o kedas lokál akontesimentu hodi hamate ahi, maibé la konsege salva uma rua ne’e,” Komandante Operasaun Autoridade Protesaun Sivíl (APC-sigla portugeza), Francisco Viana, hateten iha ninia kna’ar fatin, Kuarta ne’e.

Viana relata ekipa APC seidauk hatene kauza husi inséndiu referidu mezmu deskonfia sirkuitu eletrisidade no relata mós katak vítima hamutuk na’in-hitu oras ne’e sei asegura aan iha família nia hela fatin hodi hein verifikasaun antes apoia materiál rekuperasaun husi nasionál.

APC apela ba komunidade atu kontinua kuidadu aan husi dezastre naturál liuliu bainhira sai husi uma, presiza hamate liña eletrisidade no ekipamentu sira-ne’ebé hamosu inséndiu.

Entretantu, vítima husi família rua hetan ona apoia emerjénsia husi APC kompostu husi hahán no materiál koziña.

Jornalista: Natalino Belo 

Editór: Xisto Freitas da Piedade