INSS-BNCTL halo pagamentu faze datoluk ba benefisiáriu na’in-6.953 iha Kovalima
KOVALIMA, 30 Setembru 2026 (TATOLI) – Benefisiáriu na’in-6.953, kompostu husi ema idade ferik-katuas no ema ho defisiénsia, sei simu pensaun sosiál husi Ministériu Solidariedade Sosiál no Inkluzaun (MSSI), liuhusi Banku Nasionál Komersiál Timor-Leste (BNCTL), iha faze datoluk iha 12 Outubru 2026.
“Bazeia ba dadus benefisiáriu pensaun sosiál ba ema idade ferik-katuas no ema ho defisiénsia husi postu administrativu hitu, total benefisiáriu ba pagamentu faze datoluk hamutuk na’in-6.953, ho orsamentu hamutuk $1.578.230,” Koordenador INSS Kovalima, Bernardino Sequira, hateten iha Suai, Kovalima.
Nia hateten prosesu pagamentu pensaun sosiál ba faze datoluk iha munisípiu Kovalima, sei hahú iha 12 Outubru no remata iha 16 Outubru 2026. Pagamentu sei halao tuir oráriu ne’ebé MSSI simu husi BNCTL no sei distribui ba postu administrativu sira.maibé balun ne’ebé mak uza ATM foti ona sira nia osan.
Pensaun sosiál ba ema idade ferik-katuas fahe tuir grupu idade. Ema ho idade 60 to’o 69 tinan sei simu $60 kada fulan, $180 ba fulan tolu. Ema ho idade 70 to’o 79 tinan sei simu $80 kada fulan, ka $240 ba fulan tolu. Enkuantu ema ho idade 80 tinan ba leten sei simu $100 kada fulan, ka $300 ba fulan tolu.
Tuir dadus pagamentu iha faze datoluk, total benefisiáriu iha postu administrativu hitu iha Munisípiu Kovalima hamutuk na’in-6.953.
Antes ne’e, iha faze daruak, total benefisiáriu pensaun sosiál ba ema idade ferik-katuas no ema ho defisiénsia hamutuk na’in-6.870. Husi númeru ne’e, benefisiáriu idade ferik-katuas hamutuk na’in-6.513, enkuantu benefisiáriu ho defisiénsia hamutuk na’in-357.
Iha faze dahuluk, total benefisiáriu hamutuk na’in-7.218, kompostu husi ema idade ferik-katuas na’in-6.843 no ema ho defisiénsia na’in-375.
Jornalista: Celestina Teles
Editór: Florencio Miranda Ximenes
