José Belo reeleitu ba Prezidente CNE
DILI, 30 Setembru 2026 (TATOLI) – José Agostinho da Costa Belo reeleitu ba Prezidente Komisaun Nasionál Eleisaun (CNE, sigla portugés) ba mandatu tinan lima.
Parlamentu Nasionál liuhusi reuniaun plenária estraordinária, kuarta-feira ne’e, hala’o eleisaun ba membru efetivu na’in-tolu no membru suplente ba CNE.
Bankada Kongresu Nasionál Rekonstrusaun Timorense (CNRT, sigla portugés) aprezenta kandidatu José Agostinho da Costa Belo ho Odete Maria Belo no husi Bankada Frente Revolusionária Timor-Leste Independente (FRETILIN) mak Leonardo Amaral nu’udar membru efetivu.
Bankada CNRT aprezenta mós kandidatu membru suplente António Amaral Ximenes Perreira ho Paula Flamina da Silva de Cortereal.
Hodi prosede prosesu eleisaun eskrutiniu hodi hili pakote ida de’it ho rezultadu votu a favór 59, kontra rua, abstensaun ida no nulu ida, ho prezensa deputadu na’in-63 no rua auzénsia. “Ita ramata ho eleisaun ba membru CNE ne’ebé reprezenta Parlamentu”, Prezidente Parlamentu Nasionál, Maria Fernanda Lay, fó sai iha sala plenária, ohin.
Hafoin ne’e kontinua kedas ba prosesu eleisaun ba Prezidente CNE ho kandidatu úniku José Agostinho ne’ebé aprezenta husi Bankada CNRT, PD no KHUNTO.
Iha rezultadu votu a favór 45, kontra 15 no abstensaun tolu. Nune’e, atuál Prezidente CNE ne’e reeleitu ba mandatu tinan lima.
Tuir karta aprezentasaun bankada sira-nian ba kandidatu, José Agostinho Belo, komesa ninia serbisu iha CNE ho prova ninia indepedénsia no refere sidadaun ne’ebé disponivel atu kontinua serbí no garante eleisaun sira ne’ebé hala’o ho forma independente.
Konsidera mós eleisaun prezidensiál no podér lokál iha tinan oin importante tebes iha kontestu nasionál no índise demokrátiku ne’ebé Timor-Leste iha Komunidade País Ko’alia Lia-Portugés (CPLP) no Asosiasaun Nasaun Sudeste Aziátiku (ASEAN, sigla inglés).
Odete Maria Belo, hanesan mós atuál komisária iha CNE ne’ebé antes ne’e kumpre ona ninia knaar ho lealdade no respeita ba lei hodi garante eleisaun implementa tuir lei.
Leonardo Amaral, serbisu iha Sekretariadu Tékniku Administrasaun Eleitorál (STAE) ho konsidera iha kompeténsia téknika ba hala’o funsaun iha CNE.
Tuir ajenda, Prezidente CNE eleitu ho komisáriu sira sei simu pose iha loron 02 Outubru.
Lembra katak, Prezidente CNE, José Agostinho Belo, ho nia kompozisaun atuál ninia mandatu ramata ona iha 16 Agostu ne’e.
Tuir Lei númeru 7/2026, 29 Maiu, alterasaun dahaat husi Lei númeru 5/2006, loron 28 Dezembru, Órgaun Administrasaun Eleitorál, reprezentasaun husi Parlamentu Nasionál iha membru na’in-tolu ba CNE, ho mandatu tinan lima, renovavel. No órgaun lejizlativa ne’e mak hili Prezidente CNE liuhusi eleisaun ba kandidatu sira ne’ebé bankada parlamentár sira aprezenta.
Jornalista: Nelson de Sousa
Editora: Maria Auxiliadora
