Obra Públika Oekusi propoin projetu foun 105 iha narrativa proposta OJE 2027
OEKUSI, 30 Setembru 2026 (TATOLI) – Diresaun Servisu Rejionál Obra Públika, iha Rejiaun Administrativa Espesiál Oekusi Ambeno (RAEOA), propoin projetu foun hamutuk 105 iha narrativa proposta Orsamentu Jerál Estadu (OJE) 2027 atu implementa iha tinan oin.
Diretór Servisu Rejionál Obra Públika Oekusi, Remígio Nuno Sila, informa katak projetu 105 ne’e, nu’udar xave estratéjiku sira iha Oekusi liliu ba sub-rejiaun suku no aldeia.
“Iha númeru projetu barak, projetu 105 ita propoin ona ba iha Ministériu, entau sei haree, tanba foin lalais, informa atu halo exersisíu, karik exersisíu ne’e reflete ona ho kondisaun 2027 ita bele implementa,” nia hateten ba jornalista sira iha Oekusi, ohin.
Remígio Sila hatutan, projetu hirak-ne’e, hanesan prosesu narrativa ka prepara proposta, tanba RAEOA presiza tebes dezenvolvimentu ba povu liliu sub-rejiaun sira iha área rurál suku no aldeia sira, maibé depende aprovasaun orsamentu ba iha OJE 2027.
“Maibé agora depende mós ezekusaun OJE 2026 tinan ne’e, karik to’o trimestre dahaat rezultadu ezekusaun di’ak, ha’u hanoin alokasaun ba futuru ne’e tuir duni proposta ne’ebé ita submete ona ba iha Ministériu Finansa bele konsidera atu aumenta tan osan,” nia hateten.
Tanba iha proposta OJE 2027 la’ós ba projetu foun de’it, maibé inklui dívida ba projetu reapropriasaun sira, barak maka seidauk finaliza, liliu ba retensaun 10%, presiza tau osan hodi iha tinan oin.
Notísia relevante:
Nia esplika katak, husi projetu foun 105 ne’e husi diresaun hothotu, ba setór edukasaun iha unidade 25 maioria ba edifisíu no saladeaula, setór agrikultura propoin projetu tolu ba irigasaun, administrasaun no rekursu umanu liliu ba formasaun profisionál iha projetu ida, no projetu báziku hanesan estrada iha projetu 39 no EDTL nian naroman ba povu, ponte no seluk tan.
Notísia relevante:
Dirijente ne’e, la esplika detallu kona-ba fundu infraestrutura sira-ne’e, maibé antes ne’e, Autoridade RAEOA lideradu Prezidente Autoridade RAEOA, simu ona tetu husi iha reuniaun Komite Revizaun Polítika ba preparasaun OJE 2027 iha salaun Ministériu Finansa hamutuk millaun $50.
Husi millaun $50 ne’e, fahe ba rua, ba Fundu Espesiál Dezenvolvimentu (FED) millaun $30 no funsionamentu administrasaun RAEOA millaun $30.
Notísia relevante:
Jornalista: Abílio Elo Nini
Editór: Rafael Ximenes de A. Belo
