OMS apoia Abate no Malathion ba MS hodi prevene dengue
DILI, 30 Setembru 2026 (TATOLI)—Organizasaun Mundiál Saúde (OMS) apoiu Abate kilógrama 6.000 no Malathion litru 3.100 Ministériu Saúde atu hametin esforsu prevensaun no kontrolu moras dengue iha Timor-Leste.
“Abate mak produtu larvasida ne’ebé uza hodi kontrola ka hamate larva susuk ne’ebé moris iha bee, hanesan iha tanke, kontenadór no rezervatóriu bee. Enkuantu, Malathion mak insetisida ne’ebé uza hodi kontrola susuk adultu, liuliu susuk Aedes ne’ebé bele tranzmite vírus dengue. Uza produtu hirak-ne’e tenke tuir orientasaun no prosedimentu seguransa ne’ebé determina hosi autoridade saúde,” Diretora Jerál Kuidadu Saúde Primária, Elizabeth Letomau hateten banhira ramata seremónia entrega (handover) ekipamentu saúde iha Lahane, Kuarta ne’e.
Nia afirma Abate ho Malathion ne’e importante tebes tanba Timor-Leste ne’e endémiku ba moras dengue. Bainhira udan tun, risku moras dengue aumenta, entaun sasán sira ne’ebé MS simu ne’e importante tebes atu apoia servisu Ministériu Saúde halo prevensaun ba moras dengue.
“Atividade kontrolu no prevensaun dengue hala’o ona durante semana rua liubá, no apoiu ne’e sei ajuda kompleta liután no hametin tan atividade Ministériu Saúde nian,” nia esplika.
Iha fatin hanesan, Reprezentante OMS iha Timor-Leste, Arvind Mathur, hateten entrega apoiu ne’e reflete parseria entre Ministériu Saúde, Ministériu Edukasaun, KOICA no OMS hodi proteje saúde no moris di’ak povu Timor-Leste.
“Apoiu ne’e primeiru liu atu haree ba kontrolu no halo prevensaun ba surtu dengue ne’ebé bele mosu iha futuru,” Arvind subliña.
Nia informa liuhusi apoiu KOICA, fasilita ona aprovizionamentu Abate kilógrama 6.000 no Malathion litru 3.100 ba Ministériu Saúde, liuhusi Diresaun-Jerál Kuidadu Saúde Primária, hodi hametin intervensaun kontrolu vetór.
“Apoiu ne’e sei uza hodi hametin prevensaun dengue iha eskola no komunidade, liuhusi esforsu hamenus fatin ne’ebé bele sai risku ba susuk,” nia relata.
OMS konsidera kontrolu vetór ne’ebé efetivu, konxiénsia komunidade no asaun sedu importante tebes, liuliu tanba mudansa klimátika no kondisaun ambientál bele aumenta risku surtu dengue.
Aleinde apoiu Abate no Malathion, OMS mós entrega pakote materiál promosaun saúde no nutrisaun ba eskola sira.
“Apoiu nutrisaun ne’e konsidera importante tanba Timor-Leste kontinua hasoru dezafiu má nutrisaun no aumenta risku ba moras la hada’et,” nia tenik.
Arvind hateten materiál sira-ne’ebé entrega sei apoia kampaña nutrisaun eskolár, atividade promosaun saúde, divulgasaun no envolvimentu parte interesada sira, ne’ebé lidera hosi Ministériu Saúde iha kolaborasaun ho Ministériu Edukasaun.
OMS espera materiál hirak-ne’e bele ajuda hodi halo informasaun kona-ba saúde sai vizivel, atrativu no prátiku ba estudante sira.
OMS reafirma kompromisu atu kontinua servisu hamutuk ho Ministériu Saúde, KOICA no parseiru sira seluk hodi hametin prevensaun dengue, saúde eskolár no kuidadu saúde primária ne’ebé reziliente iha Timor-Leste.
Entretantu, materiál hirak-ne’e hetan suporta finanseiru maihusi KOICA no aprovizionamentu ne’ebé fasilita husi OMS ba Ministériu Saúde hodi haforsa prevensaun dengue no kontrolu vetór iha Timor-Leste.
Jornalista: Felicidade Ximenes
Editór: Xisto Freitas da Piedade
