Reabilitasaun estrada urbana iha Venilale iha progresu
BAUKAU, 30 Setembru 2026 ( TATOLI)–Prosesu reabilitasaun estrada urbana iha Postu Administrativu Venilale atualmente iha progresu.
Administradór Postu Administrativu Venilale, Munisípiu Baukau, José Freitas Boavida, esplika kompañia responsável hala’o hela konstrusaun ba obra referida ho totál kilómetru neen iha-ne’ebé kuaze konesaun bá suku sira hanesan to’o bá Sítiu Turizmu Na’in-Feto Auxiliadora iha foho Ariana.
“Projetu ne’e kuaze atinje ona pursentu 19. Ha’u garante sei finaliza iha tempu badak tanba responsabiliza husi kompañia internasionál,” Administradór Postu Administrativu Venilale informa iha Vila Nova, Baukau, Kuarta ne’e.
José Boavida relata, tuir planu, autoridade postu sei hato’o pedidu adisonál atu kompleta fasilidade tanba sei fasilita komunidade atu asesu ba suku ualu inklui estudante sira-ne’ebé hala’o estudu iha Venilale Vila.
“Kualker obra sempre hasoru dezafiu iha parte téknika inklui klima. Ha’u labele dehan di’ak hotu kedas maibé rezultadu mak sei hatudu,” José subliña.
Entretantu, tuir kontratu, projetu reabilitasaun estrada urbana iha Postu Administrativu Venilale ho durasaun tinan-ida, responsabiliza husi Kompañia Augusto Hahú, Lda no kompañia HXF Huaxian Holding, Lda, ho totál orsamentu hamutuk $3.715.130,09.
Jornalista: Natalino Belo
Editór: Xisto Freitas da Piedade
