Suku lima iha Venilale finaliza ona atividade PNDS
BAUKAU, 30 Setembru 2026 ( TATOLI)–Suku lima finaliza ona implementa atividade regulár Programa Nasionál Dezenvolvimentu Suku (PNDS) iha Venilale, Munisípiu Baukau.
Administradór Postu Administrativu Venilale, José Freitas Boavida, esplika PNDS tinan-ne’e hamutuk sanulu kompostu husi atividade regulár ualu no adisonál rua implementadu iha suku ualu iha-ne’ebé suku lima mak finaliza ona, enkuantu suku tolu seluk iha faze finalizasaun.
“Suku lima ne’e fizikamente finaliza ona maibé obra balun orsamentu la sufisiente. Ita sei hato’o pedidu atu autoridade aselera ida-ne’e,” Administradór Postu Administrativu Venilale informa iha Vila Nova, Baukau, Kuarta ne’e.
José Boavida relata suku lima ne’ebé finaliza ona obra hirak-ne’e mak hanesan Uma-Ana-Iku konstrui mini irrigasaun, Fatulia, Uailaha no Uma-Ana-Ulo reabilita estrada no kampu funsaun (adisonál) no estrada rurál iha Suku Uatuhako.
Enkuantu, suku tolu ne’ebé sei iha faze finalizasaun mak Bahamori implementa konstrusuan mini irrigasaun, Baduho’o konstrui mini irrigasaun no Uaioli implementa sistema abastesimentu bee-moos no saneamentu.
“Povu kontente tanba prioridade sira-ne’e husi komunidade entaun benefísia direta sira,” José Boavida haktuir.
Entretantu, alokasaun orsamentu PNDS tinan-ne’e ba suku ualu iha Postu Administrativu Venilale hamutuk rihun $303-resin husi totál orsamentu ba munisípiu Baukau hamutuk $2.427.434,00, iha-ne’ebé aloka ba atividde regulár $1.975.499,00 no adisonál hamutuk sanulu $238.663,00 no kozína merenda eskolár hitu $213.272,00.
Jornalista: Natalino Belo
Editór: Xisto Freitas da Piedade
