Verifikasaun ba reklamasaun lista veteranu konklui ona, hein hatama ba baze dadus
DILI, 30 Setembru 2026 (TATOLI)–Verifikasaun ba reklamasaun no kontestasaun lista Kombatente Libertasaun Nasionál ba tinan 2009 nian konklui ona iha territóriu, hein hatama ba baze dadus hafoin publika ba públiku.
“Lista ema hamutuk 61.704 verifikadu. Ne’ebé, ita hein hatama (insert) ba baze dadus. Ne’e ema rihun ba rihun, tan ne’e presiza kuidadu. Tuir lei, publikasaun ne’e iha Janeiru tinan oin,” Ministru Asuntu Kombatente Libertasaun Nasionál, Gil da Costa Monteiro “Oan-Soru” dehan iha Palásiu Governu, Kuarta ne’e.
Oan-Soru reafirma lista veteranu ne’e barak, tanba ne’e presiza kuidadu dokumentu no atensaun bainhira insert ba baze dadus.
Lista ne’ebé simu hamutuk 61.704, kompostu husi reklamasaun 58.584 no kontestasaun 3.120, ne’ebé husi ne’e ema hamutuk 53.272 iha teritóriu halo protestu hasoru Komisaun Kombatente nian.
Liuhosi konteúdu ne ebé mensiona iha Estatutu Kombatente Libertasaun Nasionál, Lei Númeru 3/2006, no artigu 13, hateten rejistu kualidade hanesan Kombatente Libertasaun Nasionál sei kontinua hala’o validasaun rejistu ba períodu daruak nian ba rekoñesimentu kombatente hanesan libertasaun nasionál ne’ebé rejista iha tinan 2009.
Jornalista: Osória Marques
Editór: Xisto Freitas da Piedade
