Asu 675 simu ona vasina kontra Raiva iha Baukau
BAUKAU, 01 Outubru 2026 (TATOLI)—Ekipa Task Force Baukau Zero ba Moras Raiva (BAZERA) vasina ona asu hamutuk 675 iha Munisípiu Baukau.
Médiku Veterináriu Munisípiu Baucau, Zélia Ximenes, esplika asu hirak-ne’e ekipa BEZERA halo vasina husi fulan hirak liubá to’o agora iha-ne’ebé asu hamutuk 50 mak indetifikadu pozitivu Raiva.
“Ami la’ós foin hala’o vasina ne’e maibé dezde Abríl kedas bainhira rejista kazu ami la’o hala’o vasinasaun,” Zélia Ximenes hateten iha Suku Buruma, Baukau, Kinta ne’e.
Médiku ne’e relata husi totál asu ne’ebé vasina ona rejista iha Postu Administrativu Vemasse inkluindu Postu Baukau Vila iha-ne’ebé antes ne’e rejista ona kazu ne’ebé akontese hodi afeta komunidade balun.
Aleinde ne’e, ekipa BAZERA rasik kontinua halo vasinasaun bazeia ba karta sirkulár ne’ebé antes ne’e fó-sai ba públiku liliu iha área afetada hanesan Postu Baukau Vila.
“Ami sei la’o hela vasinasaun iha fulan-Setembru nian, depoiz ami rekolla hotu mak ita relata fali ba públiku,” Zélia Ximenes akresenta.
Entretantu, tuir dadus husi ekipa BAZERA durante inisiu tinan-ne’e rejista vitíma ba virus raiva ka asu tata hamutuk na’in-742 iha Baukau kompostu mane hamutuk 399 no feto 343 ho totál mate na’in-haat no kazu suspeitu na’in-ida.
Husi totál vitíma na’in-742 rejista iha Janeiru hamutuk 46, Fevereiru 27, Marsu 43, Abríl 78, Juñu 149, Jullu 107 no Agostu hamutuk na’in-140 ne’ebé maioria lokaliza iha Postu Baukau Vila hanesan Bahú kazu hamutuk 117, Tirilolo 113, Gariuai 77, Uailili 54, Buibau 28, Buruma 16, Builai 16, Bukoli 19 no Samalari kazu hamutuk 13.
Aleinde ne’e, Postu Venilale husi Suku Uatuhako kazu hamutuk 21, Postu Vemasse iha Suku Vemasse tasi 21 no Postu Kelikai iha Suku Letemumu hamutuk 16.
Jornalista: Natalino Belo
Editór: Xisto Freitas da Piedade
