Atleta modalidade oioin husi Baukau sei kompete iha FND no FDP

BAUKAU, 01 Outubru 2026 (TATOLI)—Atleta modalidade oioin husi Munisípiu Baukau sei partisipa iha Festivál Nasionál Desportu (FND) no Festivál Desportu Paralímpiku (FDP) ne’ebé tuir planu sei realiza iha finde tinan-ne’e.

Prezidente Konfederasaun Desportu Timor-Leste (CDTL-sigla portugeza) Munisípiu Baukau, João Buka Tuir, esplika ekipa ne’ebé maihusi kada asosiasaun no federasaun sira hahú halo preparasaun ba atleta hamutuk 100-resin hodi partisipa iha kompetisaun nivél nasionál hanesan FND no Festivál Desportu Paralímpiku (FDP).

“Ita fó ona orientasaun atu asosiasaun idaidak prepara ita-nia atleta sira atu reprezenta Munisípiu Baukau,” João hateten iha Vila Antiga, Baukau, Kinta ne’e.

Buka Tuir relata bazeia ba karta husi Ministériu Juventude, Desportu, Arte no Kultura (MJDAK), modalidade ne’ebé preparadu mak hanesan Futeból, Tutsál, Voleiból, Basketból, Atletizmu, Boxe Amadora, Taekwondo, Karatedo, Xadres, Badminton, Ténis Meza, desportu tradisionál hanesan Hana Kalik, Archery, no Powerlifting.

Nia hatutan CDTL Baukau sei prepara modalidade sira-ne’ebé envolve atleta feto no mane tuir nesesidade kada modalidade, enkuantu modalidade Powerlifting sei partisipa de’it husi atleta mane.

“Ita-nia preparasaun másima ona. Ita fiar ba ita-nia asosiasaun sira sei lori rezultadu di’ak mai Baukau,” Buka Tuir akresenta.

Entertantu, Munisípiu Baukau hetan apoiu orsamentu hamutuk rihun $15 husi Governu hodi halo preparasaun ba nesesidade atleta sira durante eventu iha Dili.

Aleinde ne’e, CDTL Baukau sei halo koordenasaun ho setór privadu liuliu buka apoiu ba nesesidade preparasaun no estadia atleta sira durante partisipasaun iha FND no FDP 2026.

Jornalista: Natalino Belo 

Editór: Xisto Freitas da Piedade