Estrada Kailaku-Bilimau 26 km tama ona faze implementasaun fíziku
BOBONARU, 01 Outubru 2026 (TATOLI) – Empreza internasionál PT Bina Mitra Indohsejatera hahú ona servisu limpeza (clearing) hodi inisia implementasaun projetu reabilitasaun estrada urbana postu administrativu Kailaku, liuhusi Mau-Mali to’o Bilimau, ho distánsia kilómetru (km) 26.
Koordenadór Infraestrutura Ministériu Obra Públika (MOP) Munisípiu Bobonaru, Fernando de Fátima, hatete katak serbisu limpeza ne’e sai hanesan etapa dahuluk hodi prepara área estrada tuir dezeñu no Bill of Quantities (BOQ) ne’ebé prepara ona.
“Ohin ita hahú ona clearing, signifika katak ita komesa ona hamoos estrada no ai-horis iha ninia sorin sira tuir dezeñu no BOQ. Serbisu ida-ne’e semana hira liubá ita hahú ona, ekipa kompañia nian halo ona levantamentu dadus topografia hodi determina luan estrada, valeta, box culvert no estrutura sira seluk”, nia hatete ba Tatoli, kinta-feira ne’e.
Responsavel ne’e esplika katak hafoin serbisu limpeza remata, empreza sei kontinua serbisu eskavasaun ba estrutura muru, line drain ba valeta no konstrusaun box culvert ka ponte ki’ik sira.
“Ita espera katak ba oin komunidade sei kolabora ho kompañia para implementasaun obra ne’e la’o ho di’ak no susesu tuir ita hotu nia hakarak”, nia hatutan.
Administradór Postu Administrativu Kailaku, Rudolfo da Cruz, hato’o apresiasaun ba hahú serbisu reabilitasaun estrada ne’e no promete katak autoridade postu sei kontinua akompaña prosesu implementasaun to’o remata.
Nia hatete katak molok serbisu limpeza hahú, autoridade lokal halo ona sosializasaun ho komunidade liuhusi enkontru no lideransa komunitária hodi fó hatene kona-ba projetu no husu komunidade atu fó apoiu ba implementasaun obra.
“Komunidade hotu tenke kontribui ba serbisu ne’ebé kompañia sei halo. Ami sei akompaña se iha limpeza lokál ne’ebé afeta ai-oan ka uma komunidade nian, atu rezolve tuir dalan ne’ebé di’ak, tanba komunidade hein estrada ne’e tinan barak ona, terus ba estrada ida-ne’e. Ita agradese ba Governu tanba bele halo ona estrada ne’e tanba komunidade atu lori sira-nia produtu lokál asesu bá merkadu susar tebetebes”, nia afirma.
Aleinde ne’e, komunidade Kailaku, Bosco Martins, sente kontente tanba mehi naruk atu asesu estrada di’ak ohin ba oin sai ona realidade.
Bosco dehan sira prontu kontribui no kolabora hodi fó susesu ba programa Governu nian ne’e, tanba estrada referida fó benifísiu tanjivel ba povu.
“Ohin loron 01 de Outubru 2026 kompañia halo ona estrada ne’e, aban-bainrua rai-rahun ho tahu laiha ona. Agora, ami sente di’ak ona, tanba durante tinan barak ne’e terus más foin ohin loron mak Maromak tau-matan”, nia dehan.
Projetu ne’e empreza konstrutora ezekuta ho valór kontratuál $21.713.665,71.
Enkuantu reabilitasaun estrada Maliana-Kailaku ne’e konsidera importante atu hadi’a asesu transporte no fasilita koneksaun entre komunidade iha área fronteira no zona rurál iha munisípiu Bobonaru.
Projetu ne’e mós bele kontribui ba hadi’a mobilidade komunidade no apoia atividade ekonómika sira iha área sira-neʼebé liuhusi estrada ne’e.
Notísia relevante: Governu presiza aselera prosesu estrada Kailaku hodi fó benifísiu tanejivél ba povu
Jornalista: Sergio da Cruz
Editora: Maria Auxiliadora
