FHC ho voluntáriu fasilita formasaun ba joven sira iha Kovalima
KOVALIMA, 01 Outubru 2026 (TATOLI)- Forsa Humanista Kovalima (FHC) ho voluntáriu hahú fasilita formasaun gratuitu ba foin-sa’e sira iha Munisípiu Kovalima, ho matéria lideransa no lian Inglés báziku.
Formasaun ne’e hala’o durante fulan tolu no iha nia objetivu atu dezenvolve koñesimentu, kapasidade no konfiansa ba foin-sa’e sira, nune’e sira bele partisipa ho ativu iha komunidade. Programa ne’e mai husi prinsipiu voluntarizmu ne’ebé FHC hahú implementa iha tinan 2018.
“Ho prinsípiu voluntarizmu ne’ebé ekipa iha, ami deside hahú fasilita formasaun ba foinsa’e sira ne’ebé iha inisiativa atu aprende hamutuk. Formasaun ne’ebé ami loke mak Publik Speaking, lideransa no lian Inglés báziku,” Reprezentante Prezidente FHC, Agustinho Amaral, hateten ba jornista iha Kovalima
Formasaun ne’e gratuitu, hahú husi rejistu, prosesu aprendizajen to’o sertifikadu ba partisipante sira ne’ebé kompleta programa.
“Ami loke formasaun ne’e ho espíritu voluntarismu no gratuitu ba foin-sa’e sira. Objetivu mak atu fó oportunidade ba jerasaun foun atu dezenvolve sira-nia koñesimentu, kapasidade no konfiansa-an,” nia dehan.
Agustinho subliña katak inisiativa ne’e nu’udar kontribuisaun FHC ba dezenvolvimentu kapasidade foin-sa’e sira, liuhusi edukasaun no servisu voluntáriu.
Nune’e, FHC hein katak formasaun ne’e bele ajuda foin-sa’e sira atu hadi’a kapasidade ko’alia iha públiku, dezenvolve abilidade lideransa no aprende lian Inglés, hodi bele uza koñesimentu hirak ne’e iha moris loroloron no iha servisu ba komunidade.
Jornalista: Celestina
Editor: Florencio Miranda Ximenes
