Kamioneta baku-fila iha Sana Uatulari, pasajeiru ida lakon vida

VIKEKE,  01 Outubru  2026 (TATOLI)—Kamioneta ida ho xapa matríkula 57-435 baku-fila iha Kuarta (29/09) kalan maizumenus  tuku 20:00 Otl, iha área Aldeia Sana, Suku Uaitame, Postu Uatulari, Munisípiu Vikeke, rezulta abitante na’in-ida lakon vida no na’in-lima kanek grave.

Sub Xefe Seksaun Tránzitu Eskuadra Uatulari, Inspetór Asistente Deolindo da Silva Madeira, haktuir vítima sira transferida ona bá Munisípiu Vikeke hodi halo tratamentu intensivu no motorista mak daudaun ne’e sei sela iha Polísia Eskuadra Uatulari.

“Kona-ba akontesimentu kamioneta baku-fila hodikalan ne’e, rezulta abitante ida lakon vida iha fatin kedas, tanba karreta baku fila monu kedas iha abitante ne’e nia leten. Enkuantu, pasajeiru sira seluk ami evakua kedas husi área Sana mai Sentru Saúde Uatulari hodi halo tratamentu, maibé kanek grave hotu nune’e transfere kedas bá  internamentu iha Vikeke Vila hodi halo tratamentu intensivu,” Deolindo ba TATOLI, iha Postu Uatulari, Kinta ne’e.

Deolindo  hatutan karreta referida husi Uatulari Vila atu hala’o viajen bá diresaun Edmumu no vítima hirak-ne’e nu’udár abitante Uatulari nian.

“Ami hodikalan kaptura kedas  motorista. Nune’e, agora daudaun motorista ne’e sei iha sela detensaun Polísia Eskuadra Uatulari, ne’ebé oraoras tan mak foin halo prosesu investigasaun ba nia. Tan ne’e, kauza husi asistedente seidauk bele fó-sai ba públiku. Hafoin prosesu investigsaun hotu foin bele fó-sai,” nia subliña.

Kona-ba mate-isin vítima ne’e, Deolindo dehan, família sira husi matebian  nian lori ona bá nia rezidénsia iha Uatulari hodi halo prosesu sermónia fúnebre nian.

“Mate-isin lori ona bá matebian nia uma. Hafoin akontesimentu asindente ne’e, situasaun la’o ho hakmatek—família sira la hamosu problema ruma,” nia tenik.

 Jornalista: Vitorino Lopes da Costa

Editór: Xisto Freitas da Piedade