MP husu Tribunál aplika pena prizaun tinan-lima ba Antigu Vise-Ministru JdS
DILI, 01 Outubru 2026 (TATOLI)–Tribunál Judisiál Primeira Instánsia Dili (TJPD), Kinta ne’e, kontinua halo julgamentu ba krime burla agravadu ne’ebé suspeitadu husi Antigu Vise-Ministru Negósiu Estranjeiru no Kooperasaun JdS iha tinan 2023.
Ministériu Públiku (MP) akuza antigu governante ne’e tanba bosok ema hodi hatama osan hodi asume kargu sai Embaixadór iha rai-li’ur.
Iha audiénsia julgamentu, Tribunál ajendada ba faze alegasaun. Nune’e, iha alegasaun MP, Nelson Magno solisita uluk ba Tribunál atu halo alterasaun kualifikasaun jurídiku ba krime ne’ebé molok ne’e imputa ba arguidu husi krime burla agravadu ba fali krime korrupsaun ativa ne’ebé previstu iha artigu 81 husi lei númeru 7/2020, 28 Agostu.
Nune’e, MP husu ba Tribunál atu aplika pena prizaun tinan-lima tanba arguidu JdS iha indísiu forte ba prátika krime korrupsaun ativa tuir artigu ne’ebé sita, tanba arguidu serbisu hamutuk ho sasin sira Alberto no Rogeiro hodi ba husu osan ba ema tuir saida mak konsta ona akuzasaun.
Notísia relevante :
Prokuradór konsidera bazeia ba depoimentu sasin sira ne’e nia deklarasaun katak sira halo funi aktu ne’e tanba arguidu mak haruka. Tanba ne’e, MP laiha dúvida hodi husu Tribunál aplika pena prizaun tinan-lima.
Iha biban ne’e, Prokuradór Nelson Magno husu mós ba Tribunál atu hasai sertidaun hodi serifika sasin na’in-rua Alberto no Rogeiro hodi MP kontinua investigasaun hodi rona sira-nia depoimentu.
Enkuantu, sertidaun husi sasin na’in-rua ne’e tenke lori kedan ba Gabinete Korrupsaun Kombate Krime Organizadu MP hodi tuir inkéritu.
Parte Defeza husi Arguidu JdS, Advogadu Privadu Ismael Asunção husu ba absolve nia kliente husi krime ne’ebé MP imputa ba nia.
Tuir Advogadu, momentu ne’e, nia kliente nu’udar Vise-Ministru Negósiu Estranjeiru no Kooperasaun, maibé lakoalia kona-ba nia atu haruka ema atu hatama osan hodi sai Embaixadór iha rai-li’ur.
Nia dehan, bazeia ba depoimentu husi arguidu antes ne’e, nomeasaun ba Embaixadór ne’e la’ós Vise-Ministru nia kompeténsia maibé órgaun seluk nia kompeténsia. Momentu ne’e nia bá hasoru duni sasin Alberto no Rogeiro akompaña husi nia Xefe Gabinete, maibé sira la ko’alia kona-ba osan maibé halo koordenasaun atu dada investidór sira mai investe iha Timor-Leste.
Advogadu la hatene kona-ba sasán sira ne’e arguidu mak fó orden atu sasin na’in-rua ba husu osan ba lezadu ne’ebé sente vítima iha prosesu ne’e. Tanba ne’e, nu’udar Defeza husi arguidu, nia husu Tribunál atu absolve arguidu husi krime ne’e.
Nia mós husu ba Tribunál atu hasai sertidaun husu MP halo inkéritu kle’an ba sasin Rogeiro no Joni iha prosesu ne’e, tanba momentu ne’e sira mak lori karta ho naran arguidu ba husu osan ba ema.
Bainhira Tribunál fó tempu ba arguidu JdS pronúnsia liafuan balun iha fin alegasaun nian, arguidu deklara katak krime ida-ne’e sasin Alberto, Joni inklui Rogeiro mak duun hodi fó deklarasaun falsa hodi mai iha Tribunál koletivu.
Tuir arguidu katak nia mandatu nu’udar Vise-Ministru la orienta ema atu ba husu osan ho nia naran atu hetan kargu hanesan Embaixadór.
Arguidu hateten ba Tribunál katak desizaun sira hanesan la’ós nia kompeténsia, bainhira ema ne’ebé sasin sira ba husu osan kalan boot ba iha nia rezidénsia maka nia ho família ho hakfodak no husu sé mak halo buat sira no nia husu ba Alberto no Rogeiro.
“Se imi la hateten sai, ha’u haruka Polísia kaer,” nia katak.
Nune’e, momentu ne’ebá arguidu obriga sidadaun na’in-rua ne’e hateten duni katak sira mak halo duni sasán hodi naran arguidu nian ba kobra osan no ema ida hatama osan $3.000.
Jornalista : Natalino Costa
Editora : Julia Chatarina
