Asidente Tráfegu iha Laga rezulta sidadaun na’in-rua kanek

BAUKAU, 02 Outubru 2026 (TATOLI)—Asidente Tráfegu entre motór ho kareta iha Postu Administrativu Laga, Munisípiu Baukau, rezulta vitíma na’in-rua hetan kanek grave.

Kazu referidu akontese iha loron Sesta ne’e hafoin motór marka Kawasaki Trail ho xapa matríkula AB-3767 husi diresaun Lautein bá Dili, iha-ne’ebé xoke kareta marka Carry ho xapa matríkula B-17941 hodi rezulta vitíma na’in-rua inisiál GC (mane) no AS (feto) husi Bauró, Postu Administrativu Lautein, Munisípiu Lautein, hetan kanek grave hodi dezloka kedas bá Ospitál Rejionál Eduardo Ximenes (HoREX).

“Kondisaun agora grave. Ita fó hatene tiha ona ba família kona-ba kondisaun pasiente no risku sira- ne’ebé bele akontese,” Médiku Sala Emerjénsia HoREX, Evangelino Soares, hateten iha ninia kna’ar fatin, Vila Nova, Baukau, Sesta ne’e.

Evangelino Soares relata vitíma AS sofre fratura segmentál iha parte kesu, akompaña ho raan sai barak husi inus no ibun tanba hetan impaktu maka’as, enkuantu vítima GC sofre fratura iha ain parte loos.

Parte HoREX Baukau akompaña kondisaun vitíma na’in-rua antes foti desizaun atu halo transferénsia bá Hospital Nasional Guido Valadares (HNGV), Dili, hodi halo ezame Computed Tomography (CT) Scan no hetan tratamentu espesializadu.

“Feto ne’e lakon konxiénsia, nia nivel konsiénsia tun, ran sai husi ibun no taka nia iis. Ami halo esforsu hodi salva,” Evangelino Soares haktuir.

Entretantu, kazu asidente tráfegu referidu parte Komandu Polísia Nasionál Timor-Leste (PNTL) Baukau liuhusi Seksaun Tránzitu to’o kedas lokál akontesimentu hodi rekolla evidénsia sira no halo investigasaun ba kauza asidente.

Jornalista: Natalino Belo 

Editór: Xisto Freitas da Piedade