Casa Vida halibur no proteje labarik vítima violasaun seksuál na’in 59
DILI, 02 Otubru 2026 (TATOLI) — Diretora Casa Vida Timor-Leste, Alzira Pereira, informa katak husi inísiu Janeiru to’o Outubru 2026, Uma Mahon Casa Vida iha Dili akomoda labarik feto no menoridade vítima insestu no violasaun seksuál hamutuk na’in 59.
“Entre vitima sira ne’e, foti husi munisípiu 13, inklui Oe-Cusse, ho objetivu atu garante sira-nia protesaun, reabilitasaun psikolójika no preparasaun ba reintegrasaun fali iha sosiedade ho dignidade,” Alzira Pereira hateten ba TATOLI iha nia fatin servisu, Lecidere, Dili, Sexta ne’e.
Nia esplika katak, husi labarik vítima nain 59 ne’ebé idade entre tinan 11 no 17, nain 11 mak vítima kazu insestu, ne’ebé alegadamente hetan violasaun seksuál husi sira-nia aman no tiun.
Kazu hirak-ne’e agora daudaun iha prosesu iha tribunal hodi buka justisa ba vítima sira.
Enkuantu labarik vítima nain 48 seluk, hetan violasaun seksuál husi ema seluk ne’ebé la’ós membru família.
“Entaun, sira-ne’e ami akomoda hotu iha Uma Mahon hodi fó protesaun ba sira no ajuda sira atu hetan justisa molok reintegra fali ba sira-nia família,” nia dehan.
Diretora ne’e hato’o mós katak, husi labarik vítima nain 59 ne’ebé akomoda iha Uma Mahon, nain lima mak partus durante sira hela iha Uma Mahon.
Alzira hateten katak Uma Mahon fó fatin seguru ba labarik vítima sira, liuliu atu proteje sira husi ambiente ne’ebé bele tau sira iha risku no ameasa violénsia.
Nia enfatiza katak, atu atinji objetivu ne’e, Casa Vida dezenvolve programa sira ne’ebé konsentra ba área prinsipál, inklui seguransa no protesaun emerjénsia, asisténsia médika no psikolójika, edukasaun no formasaun vokasionál, no apoiu legál.
Iha área seguransa no protesaun emerjénsia, Casa Vida fó fatin seguru iha Uma Mahon atu proteje labarik vítima sira husi ambiente ne’ebé risku no ameasa violénsia.
Enkuantu iha área asisténsia médika no psikolójika, labarik sira hetan akompañamentu psikolójiku no kuidadu saúde atu ajuda sira rekopera husi trauma, hametin autoestima no promove sira-nia bem-estar.
Aleinde ne’e, liuhusi programa edukasaun no formasaun vokasionál, organizasaun ne’e prepara vítima sira ho abilidade prátika, inklui tein, kostura, artezanatu no literasia finanseira.
“Programa ne’e ho objetivu atu aumenta sira-nia kapasidade atu sustenta an no prepara sira ba moris independente bainhira prosesu legál remata no sira prontu atu reintegra fali iha komunidade,” Alzira hateten.
Alzira subliña katak Casa Vida mós fó apoiu legál liuhusi kooperasaun ho organizasaun sira, inklui Asisténsia Legál ba Feto no Labarik (ALFeLa), Juridiku Sosial ba Direitus Umanus (JSMP), Polícia Nasionál Timor-Leste (PNTL) no Ministériu Solidariedade Sosiál no Inkluzaun (MSSI).
Tuir Alzira, kooperasaun ne’e atu akompaña kazu sira-ne’e iha prosesu justisa, inklui iha tribunal, hodi garante vítima sira hetan apoiu nesesáriu no asesu ba justisa.
Programa Uma Mahon kontinua hala’o nia operasaun ho apoiu finanseiru husi Ministériu Solidariedade Sosiál no Inkluzaun (MSSI), doadór sira husi Polónia no Suíça, no Embaixada Tailândia iha Timor-Leste.
Jornalista: Camilio de Sousa
Editór: Filomeno Martins
