F-KHK konstrui Sentru Evakuasaun ba komunidade Suku Babulu
VIKEKE, 02 Outubru 2026 (TATOLI)–Fundasaun Knua Haberan Komunidade (F-KHK) konstrui Sentru Evakuasuan ba komunidade Suku Babulu, Postu Administrativu Uatulari, Munisípiu Vikeke, atu prevene risku dezstre naturál.
Diretór Ezekutivu Fundasaun Knua Haberan Komunidade (F-KHK), Augusto Pinto, esplika kona-ba konstrusaun Sentru Evakuasaun no armazein ih Aldeia Beli, Suku Babulu, F-KHK servisu hamutuk ho parseiru Care Inrernational.
“Daudaun ne’e ami konstrui Sentru Evakuasaun ida no armazein rai materiál dezastre naturál bá iha laran,” Augusto Pinto ba TATOLI, iha Postu Uatulari, Sesta ne’e.
Augusto haktuir konstrusaun Sentru Evakuasaun komunidade sira servisu rasik, parte F-KHK hamutuk ho parseiru Care prepara materiál konstrusaun nian.
“Ami-nia alvu konstrusaun tenke ramata iha fulan-Novembru 2026. Sentru ne’e ita harii ho multifusaun ne’ebé atividade sira seluk iha aldeia komunidade sira bele uza,” nia subliña.
Kona-ba dezafiu, nia relata, dezafiu ne’ebé F-KHK enfrenta mak menus materiál liuliu simente no rai-henek cor kampu tanba dezeñu ne’e kampu ki’ik, maibé implementasaun kampu boot, entaun hasoru difikuldade ba orsamentu.
“Orsamentu ne’ebé ami aloka ba konstrusaun Sentru Evakuasaun ne’e hamutuk rihun $5. Kampu ne’e boot, medida hanesan kampu futsál, ne’ebé osamentu ne’ebé aloka ba la sufisiente, nune’e ami relata ona ba parseiru Care para buka solusaun,” Augusto hato’o.
Nia hateten Eentru Evakuasaun ho medida 50×24, armzein ho medida 7×14 l. Konstrui hotu no kompleta ona materiál sira hanesan tenda unidade 12, bidón 58, jerigen 58, box kontainer 58 ho medida 40×80, lona (terpál) hamutuk 58 inklui materiál seluk.
Iha fatin hanesan, Xefe Aldeia Beli, Adelina da silva, hateten konstrusaun sentru evakuasaun ne’ebé konstrui iha Aldeia Beli aban-bainrua sei benefísia komunidade lokál.
“Kuandu akontese inundasaun ruma ami-nia komunidade utiliza tanba kada tinan akontese udan-boot mota sempre afeta ami-nia komunidade. Tan ne’e, ba obra kontrusaun sentru evakuasaun ne’e sei ajuda ami bainhira mosu dezastre ruma iha ami-nia aldeia,” nia tenik.
Tuir dadus, populasaun Aldeia Beli, Suku Babulu, hamutuk na’in-300.
Jornalista: Vitorino Lopes da Costa
Editór: Xisto Freitas da Piedade
