Japaun reafirma prontidaun apoia Timor-Leste iha preparasaun ba Prezidénsia ASEAN 2029
DÍLI, 02 Outubru 2026 (TATOLI) — Embaixadór Japaun ba ASEAN iha Jakarta, Yonetani Koji, reafirma prontidaun Japaun atu apoia Timor-Leste nia preparasaun ba Prezidénsia ASEAN 2029.
Embaixadór Yonetani Koji, hato’o komprimisiu ne’e durane enkontru bilaterál ho Primeiru-Ministru Kay Rala Xanana Gusmão iha Palásiu Governu, Dili, ohin.
“Ha’u mai Timor-Leste nu’udar Embaixadór Japaun ba ASEAN iha Jakarta, hodi servisu besik ho Estadu membru ASEAN sira. Ami kontente tebes haree Timor-Leste tama ona ba organizasaun rejionál ida-ne’e,” Embaixadór ne’e hateten bainhira ko’alia ho jornalista hafoin hasoru PM Xanana.
Nia dehan durante enkontru, parte rua diskute proposta Timor-Leste nian ba asume Presidénsia ASEAN 2029, ne’ebé Japaun kompromete atu fó apoiu.
Tanba ne’e, Yonetani Koji hateten Japaun hein atu servisu besik ho Timor-Leste hodi kontribui ba preparasaun no organizasaun ba pasu importante ne’e.
Vise-Ministra Asuntu ASEAN, Milena Rangel, hateten katak prezensa embaxadór Japaun nian atu espresa komitmentu hodi kontinua fó apoiu ba Timor-Leste, liuliu iha preparasaun ba Prezidénsia ASEAN 2029.
Milena Rangel hatutan katak kooperasaun entre Timor-Leste no Japaun la’ós de’it hala’o iha nível bilaterál, maibé mós envolve asuntu rejionál, inklui dezenvolvimentu rekursu umanu no seluk.
Jornalista: Alexandra da Costa
Editór: Filomeno Martins
