SEATOU husu negosiante sira atu evita fa’an sasan iha estrada-ninin
DÍLI, 02 Outubru 2026 (TATOLI) – Sekretaria Estadu Toponímia no Organizasaun Urbana (SEATOU) kontinua hala’o atividade organizasaun urbana iha merkadu sira iha Díli, liuhusi orientasaun ba negosiante sira atu fa’an sasan iha fatin ne’ebé Governu prepara ona, no evita uza estrada-ninin.
Atividade ne’e lidera husi Sekretáriu Estadu SEATOU, Germano Santa Brites Dias, ne’ebé hamutuk ho ekipa tun diretamente ba merkadu sira atu ko’alia no fó orientasaun ba negosiante sira kona-ba importánsia fa’an sasan iha fatin ne’ebé Governu prepara.
Germano hateten katak Governu prepara ona fatin iha merkadu laran atu fasilita negosiante sira hala’o atividade komersiál ho di’ak, organizadu no seguru.
“Se fa’an iha estrada-ninin, sei fó impaktu ba tráfiku no halo sidade la moos,” dehan Germano ba jornalista sira iha Merkadu Manleuana, Sexta ne’e.
Nia subliña katak atividade SEATOU nian parte husi esforsu Governu atu hamurak no organiza sidade Díli, liuliu iha aspetu limpeza, seguransa no ordenamentu iha fatin públiku.
“SEATOU nia servisu mak atu hamurak Dili. Ita hakarak Dili moos, organizadu no seguru. Tanba ne’e, husu ba ita-nia negosiante sira atu koopera ho Governu, fa’an iha fatin ne’ebé Governu prepara ona,” dehan Germano.
Aleinde fó orientasaun ba negosiante sira, ekipa SEATOU iha Merkadu Taibesi no Manleuana mós halo observasaun kona-ba kondisaun merkadu, inklui jestaun lixu no drenajen, hodi asegura katak fatin fa’an sasan sira iha kondisaun moos no seguru ba konsumidór sira.
SEATOU hateten katak atividade organizasaun urbana sei kontinua iha loron sira tuir mai, la’ós de’it iha merkadu sira, maibé mós iha fatin públiku seluk iha Díli laran.
Jornalista: Camilio de Sousa
Editór: Filomeno Martins
