Timor Plaza Hotel organiza ‘Oktoberfest’ ho entrada gratuita

DILI, 04 Outubru 2026 (TATOLI) — Timor Plaza Hotel & Apartments organiza festivál Oktoberfest ho entrada gratuita ba públiku iha Dili, hodi oferese variedade hahán, múzika no divertimentu ba komunidade no família sira.

Jerente Jerál Timor Plaza Hotel & Apartments, Rizwan, hateten Oktoberfest sai nu’udar eventu anuál ne’ebé otél organiza hodi halibur komunidade no fahe ambiente divertimentu iha sidade kapitál.

“Oktoberfest ne’e eventu ida-ne’ebé ami organiza tinan-tinan atu selebra no lori divertimentu ba ema hotu iha Dili. Iha ne’e iha hahán oin-oin, múzika no divertimentu ba família sira,” Rizwan hateten iha Timor Plaza, sábadu ne’e.

Nia esplika, maski entrada gratuita ba públiku, vizitante sira ne’ebé hakarak sosa hahán ka bebida iha eventu tenke sosa kupon hahán ne’ebé disponivel iha fatin eventu nian.

Eventu ne’e oferese variedade hahán, inklui hahán lokál, aziátika, osidentál no hahán tradisionál husi Alemaña.

“Festivál ne’e orijina husi Alemaña no koñesidu nu’udar festivál hahán no bebida. Ami hakarak lori ambiente no kultura foun ida-ne’e ba komunidade iha Dili, atu sira bele goza tempu hamutuk ho família nu’udar eventu divertidu ida,” nia subliña.

Oktoberfest ne’e realiza durante loron ida iha fin-de-semana, hahú husi lorokraik to’o kalan.

Rizwan konvida komunidade no populasaun iha Dili atu partisipa no goza ambiente Oktoberfest iha Timor Plaza Hotel & Apartments.

Jornalista: Hortêncio Sanchez

Editór: Rafael Ximenes de A. Belo