Internet Starlink iha Bobometo fasilita servisu administrasaun suku ba sistema SIIGSA
OEKUSI, 05 Outubru 2026 (TATOLI) – Xefe Suku Bobometo iha sub-rejiaun Oésilo Rejiaun Administrativa Espesiál Oekusi Ambeno (RAEOA), José Labi Caet, agradese ba Governu tanba instala ona internet Starlink iha sede suku, no fasilita tebes servisu administrasaun suku atu atualiza dadus ba Sistema Integradu Informasaun Jestaun Suku no Aldeia (SIIGSA).
“Starlink iha suku ne’e importante tanba fasilita ami servisu administrasaun suku laís liu no fasíl atu sinkroniza dadus, bainhira priénxe livru 18 la presiza ona manuál, sei ita kompara ho antes ne’e seidauk monta Starlink ne’e servisu kle’ur presiza tempu barak, maibé agora lalais de’it,” Autoridade lokál hateten, perante atividade Mídia Tour ne’ebé organiza husi Uniaun Profisaun Jornalista Timor-Leste (UPJTL), iha sede suku Bobometo, ohin.
Nia informa, utilizasaun ba internet Starlink ne’e, antes ne’e, ekipa tékniku husi Ministériu Transporte no Komunikasaun (MTK) liuhusi Diresaun Nasionál Infraestrutura Komunikasaun (DNIK) hamutuk empreza Vorakai Unipesoál Lda, no Ministériu Administrasaun Estatál (MAE) fasilita formasaun kona-ba oinsá utiliza, tanba antes ne’e sistema atendimentu iha suku manuál de’it.
“Ami kontente, tanba bainhira monta tiha, ekipa sira-ne’e fó hela formasaun, kona-ba rekolla dadus ba sistema SIIGSA ne’e, tanba iha sistema laran ne’e iha livru 18 hodi prienxe dadus suku nian tuir sistema dijitalizasaun ne’e, ne’ebé ami prienxe iha ne’e bele sinkroniza mós iha nasionál,” nia orgullu.
Autoridade komunitáriu ne’e informa mós katak, benefisíu husi internet Starlink ne’e, la’ós uza de’it ba atualizasaun dadus ba sistema SIIGSA maibé bele asesu mós informasaun sira tantu rai-laran no rai-li’ur.
Notísia relevante:Seidauk asesu, Suku Lifau-Bobometo preokupa instalasaun Starlink ba sede suku
Rekorde fali katak, internet Starlink ne’e, Ministériu Transporte no Komunikasaun (MTK) liuhusi (DNIK) hamutuk ho empreza Vorakai Unipesoál Lda, halo instalasaun ba suku 18 iha Oekusi iha loron 16 fulan-Abríl 2026 ne’e, la inklui suku foun rua, Monemeko no Kutete.
Totál populasaun iha suku Bobometo hamutuk 10.404 ho totál uma-kain 2.579 mai husi aldeia sia.
Jornalista: Abílio Elo Nini
Editór: Rafael Ximenes de A. Belo
