STAE distribui ekipamentu resensiamentu eleitorál no atualizasaun dadus biométriku
DILI, 05 Outubru 2026 (TATOLI)–Sekretariadu Tékniku Administrasaun Eleitoral (STAE), Segunda ne’e, hahú distribui ekipamentu bá munisípiu sira atu suporta prosesu Resensiamentu no Base de Dados (RBD) eleitorál, inklui atualizasaun dadus eleitór sira ho sistema biométriku ba STAE munisipál.
Ekipamentu ne’ebé distribuidu mak hanesan hanesan laptop no ekipamentu tékniku seluk ne’ebé sei uza iha postu resensiamentu sira iha territóriu nasionál.
Diretora Jerál STAE, Dulce Guterres Júnior, informa to’o agora postu resensiamentu 35 estabelesidu ona, no iha planu atu estende tan ba postu administrativu hotu-hotu, hodi fasilita eleitór sira-nia resensiamentu besik liubá sira-nia hela-fatin.
“Materiál hotu-hotu prontu ba lansamentu resensiamentu,” nia dehan ba jornalista sira iha Salaun STAE Kaikoli.
Nia esplika STAE prepara resensiamentu ne’e nu’udár parte husi preparasaun ba Eleisaun Prezidensiál 2027 no prosesu resensiamentu sei hala’o tuir kalendáriu eleitorál ne’ebé sei determina liuhosi dekretu Prezidensiál.
Ofisiál STAE ne’e hatutan katak sistema biométriku sei aplika ba eleitór hotu, inklui eleitór foun sira-ne’ebé foin rejista no eleitór sira-ne’ebé presiza atualiza sira-nia kartaun eleitorál.
Dulce hateten eleitór sira presiza troka ka atualiza kartaun atu hetan kartaun foun ne’ebé integra ho sistema biométriku.
Enkuantu, atualizasaun no rejistrasaun baze dadus iha STAE hamutuk 919.357, feto iha 441.691 no mane iha 477.666. Atualiza ona ema 341.952, feto iha 173.096 no mane iha 168.856.
Eleitór outstanding hamutuk 577.405, feto iha 268.595 no mane 308.810. Rejistu foun 54.310, feto iha 26.859 no mane iha 27.451. Hosi eleitór rejiatu foun no atualizadu hamutuk 396.262, feto iha 199.955 no mane iha 196.307.
Diretór Jerál STAE sesante entrega dokumentu ba Diretora Jerál foun
Iha parte seluk, Diretór Jerál Sekretariadu Tékniku Administrasaun Eleitorál (STAE) Sesante, Elviro Fernandes, hateten hahú husi ohin bá-oin Diretora Jerál STAE nomeada kontinua servisu ne’ebé durante ne’e trasa ona.
“Ha’u husu ba ita hotu katak ho servisu ne’ebé ita hotu trasa tiha ona, servisu ne’ebé ha’u no ita hotu sira planeia tiha ona, hamutuk ho lideransa foun hamutuk atu hodi halo preparasaun di’ak liután, liuliu preparasaun eleisaun Prezidensiál tinan oin,” Diretór Jerál STAE sesante tenik.
Nia dehan iha dezafiu barak no obstákulu barak, iha buat barak ne’ebé ita presiza, iha buat barak ne’ebé liu ona, maibé iha buat foun presiza servisu hamutuk iha fatin, atu nune’e planu sira bele heten nia rezultadu di’ak.
“Nune’e, iha 2027 ita bele realiza eleisaun ne’e ho susesu. Rendimentu no nia rezultadu ne’e mak ita hotu-hotu espera nune’e. Entaun, ohin ha’u entrega fali kolega sira-ne’e ba ita boot sira atu servisu hamutuk hodibele hetan rezultadu di’ak,” nia informa.
Entretantu, iha semana hirak liubá Governu liuhosi Konsellu Ministru nomea ona Elviro sai komisáriu CNE efetivu ba períodu tinan 2026 to’o 2031. Nia simu ona pose hamutuk ho membru CNR sira seluk iha Sesta (02 Outubru) liubá.
“Atu laiha konflitu interese iha ita-nia órgaun eleitórál hotu maka liuhusi desizaun Komisaun Funsaun Públika nian, númeru 316/2026, 30 Setembru 2026, ezonera Diretór Jerál ha’u, no nomea fali Diretora Jerál foun, Dulce Guterres Júnior,” nia haktuir.
Portantu, Diretora Jerál STAE nomeadu, Dulce Guterres Júnior, dehan servisu STAE ne’e tékniku profisionál, tenke neutru, transparénsia no imparsiálidade.
“Ha’u mai atu kompleta servisu ne’ebé diretór jerál sesante hala’o ona. Ha’u la’ós mai kompete maibé mai ita servisu hamutuk ho di’ak liután ba STAE iha futuru,” nia dehan.
Jornalista: Osória Marques
Editór: Xisto Freitas da Piedade
