Xefe Suku Bobometo agradese ba Governu tanba apoiu ona internet
RAEOA, 05 Outubru 2026 (TATOLI)—Xefe Suku Bobometo, Sub-rejiaun Oésilo, Rejiaun Administrativa Espesiál Oekusi Ambeno (RAEOA), José Labi Caet, agradese ba Governu tanba instala ona internet Starlink iha sede suku iha-ne’ebé fasilita tebes servisu administrasaun suku atu atualiza dadus ba Sistema Integradu Informasaun Jestaun Suku no Aldeia (SIIGSA).
Notísia relevante: UPJTL halo Media Tour bá Bobometo, kobertura no literasia mídia sai alvu
“Starlink iha suku ne’e importante tanba fasilita ami-nia servisu administrasaun suku ho lais liu no fásil atu sinkroniza dadus. Bainhira prenxe livru la presiza ona manuál. Se ita kompara ho antes bainhira seidauk monta internet, servisu kle’ur. Presiza tempu barak,” Xefe Suku dehan iha atividade Mídia Tour ne’ebé organiza husi Uniaun Profisaun Jornalista Timor-Leste (UPJTL), iha Sede Suku Bobometo, Segunda ne’e.
Nia haktuir utilizasaun internet Starlink, antes ne’e, ekipa tékniku husi Ministériu Transporte no Komunikasaun (MTK) liuhusi Diresaun Nasionál Infraestrutura Komunikasaun (DNIK) hamutuk ho Empreza Vorakai Unipessoal, Lda no Ministériu Administrasaun Estatál (MAE) fasilita formasaun kona-ba oinsá utiliza, tanba antes ne’e sistema atendimentu iha suku manuál de’it.
“Ami kontente tanba bainhira monta tiha, ekipa sira-ne’e fó hela formasaun kona-ba rekolla dadus ba sistema SIIGSA ne’e, tanba iha sistema laran ne’e iha livru hodi prenxe dadus suku nian tuir sistema dijitalizasaun, ne’ebé ami prenxe iha-ne’e bele sinkroniza mós iha nasionál,” nia orgullu.
Autoridade komunitáriu ne’e informa mós katak benefísiu husi internet ne’e la’ós uza de’it ba atualizasaun dadus ba sistema SIIGSA maibé bele asesu mós informasaun sira tantu rai-laran no rai-li’ur.
Iha fatin hanesan, Sekretáriu Administrasaun Suku Bobometo, Jerónimo Osvaldo dos Reis, hateten katak instalasaun Starlink iha suku ajuda fasilita servisu administrasaun, liliu iha utilizasaun livru rejistu sira-ne’ebé antes seidauk bele opera ho sistema online.
“Antes instala Starlink, sistema ne’ebé uza sei hala’o offline. Kondisaun ne’e halo prosesu sinkronizasaun dadus sai difísil, tanba sistema presiza konesaun internet atubele sinkroniza dadus ho sistema nasionál,” Jerónimo Osvaldo dehan ba jornalista sira.
Rekorda fali katak internet Starlink ne’e Ministériu Transporte no Komunikasaun (MTK) liuhusi (DNIK) hamutuk ho empreza Vorakai Unipesoál Lda, halo instalasaun ba suku 18 iha Oekusi iha loron 16 fulan-Abríl 2026 liubá, la inklui suku foun rua hanesan Monemeko no Kutete.
Jornalista: Felicidade Ximenes
Editór: Xisto Freitas da Piedade
