Autoridade Kovalima organiza formasaun lideransa ba feto potensiál
KOVALIMA, 06 Outubru 2026 (TATOLI) – Autoridade Munisípiu Kovalima (AMC) organiza formasaun ba feto potensiál sira hodi hametin kapasidade lideransa no prepara sira atu partisipa ho ativu iha prosesu desentralizasaun administrativa no podér lokál.
“Formasaun ida-ne’e foka liu ba feto potensiál iha kovalima. Bainhira feto potensiál sira hetan formasaun kona-ba desentralizasaun no podér lokál, sira bele hamriik no prontu atu lidera”, dehan Prezidente Autoridade Munisípiu Covalima (PAM), Miguel Armada Cardoso, hafoin abetruta formasaun ne’e, iha Kovalima.
Autoridade Kovalima hakarak prepara feto sira hodi bele aproveita oportunidade ne’ebé sei mosu iha prosesu desentralizasaun administrativa no oportunidade atu partisipa iha governasaun lokál.
“Formasaun ne’e ita foka ba sira atu prepara sira-nia an hodi simu desentralizasaun ne’ebé iha tempu badak liu husi prosesu ida. Ho nune’e, Munisípiu kovalima mos bele prontu atu kompete bainhira hetan oportunidade,” nia hatete.
Partisipante sira apresia inisiativa ne’e, tanba konsidera formasaun bele ajuda feto sira atu aumenta konfia aan no kapasidade atu asume papél lideransa iha komunidade.
iha fatin hanesan, Feto potensial, Alda de Fátima, hateten, formasaun ne’e importante ba feto sira ne’ebé iha interese atu lidera no kontribui ba dezenvolvimentu iha komunidade.
“Formasaun ida-ne’e importante tebes mai ami nu’udar lider. Bainhira atu lidera ho formasaun sira-ne’e, se karik povu fó fiar ami feto mós prontu atu lidera,” hatete Alda de Fátima.
Formasaun ne’e aborda matéria kona-ba abordajen jéneru, lideransa feto no desentralizasaun administrativa no podér lokál, ho objetivu atu hasa’e koñesimentu no kapasidade feto sira atu partisipa iha prosesu governasaun no dezenvolvimentu iha nivel munisípiu.
Jornalista: Celestina Teles
Editór: Florencio Miranda Ximenes
