EBC Binagari hasoru difikuldade ba sala aprendizajen

BAUKAU, 06 Outubru 2026 (TATOLI)—Eskola Bázika Sentrál (EBC—sigla portugeza) primeiru-segunda no terseiru siklu Binagari, Aldeia Orlalan, Suku Vemasse Tasi, Postu Administrativu Vemasse, Munisípiu Baukau, hasoru difikuldade ba sala aprendizajen.

Diretór Eskola Bázika Sentrál Binagari, Pasqual Correia Freitas, esplika kada tinan estudante aumentu beibeik iha-ne’ebé afeta ba utilizasaun sala aula ne’ebé la sufisiente nune’e presiza aumenta tan sala aula tolu hodi hala’o prosesu aprendizajen.

“Sala tolu ne’e tuan konstrui iha tempu Indonézia mezmu reabilita inísiu ukun an maibé to’o agora gravé liu ona,” Pasqual Freitas hateten iha kampu baru Aldeia Orlalan, Tersa ne’e.

Pasqual Freitas relata parte eskola hato’o ona ba Serbisu Munisipál Edukasaun (SME) Baukau no parte tékniku husi Ministériu Edukasaun (ME) sukat ona maibé to’o atuál seidauk iha resposta kona-ba planu konstrusaun.

Tuir planu, sala tolu ne’ebé grave ona sei sobu totál no harii foun fali tanba baki fera, ai kuda-kuda tohar no besi sira fó risku ba estudante sira bainhira halo prosesu aprendizajem.

“Kuandu aumenta tan sala tolu ne’e sufisiente ona ba estudante,” Pasqual Freitas subliña.

Entretantu, EBC Binagari rejista totál estudante hamutuk 349 no profesór hamutuk na’in-14 ho totál sala aula 12 kompostu terseiru siklu sala neen, primeiru no segundu siklu sala neen, sala saudável ba saúde ida, sala profesór rua no saneamentu.

Jornalista: Natalino Belo 

Editór: Xisto Freitas da Piedade