Eleisaun prezidensiál iha Brazíl: Flávio Bolsonaro no Lula avansa ba volta daruak
DILI, 06 Outubru 2026 (TATOLI) – Flávio Bolsonaro (Partidu Liberál, PL) no Luiz Inácio Lula da Silva (Partidu Traballadór, PT) sei hasoru malu iha volta daruak ba eleisaun prezidensiál Brazil nian.
Kandidatu na’in-rua ne’e hetan votu barak liu iha volta dahuluk, ne’ebé hala’o domingu ne’e (04 outubru), tuir dadus hosi Tribunál Superiór Eleitorál.
Flávio Bolsonaro termina kontajen votu nian iha fatin dahuluk ho 47,03% hosi votu válidu sira, ekivale ba votu 56.103.033. Lula sai segundu ho 45,16%, ka votu 53.870.724.
To’o tuku 11:21 kalan, 99.99% hosi votu sira sura ona. Eleisaun prezidensiál hala’o ba volta daruak bainhira laiha kandidatu ida maka hetan liu metade hosi votu válidu sira iha volta dahuluk. Eleisaun daruak marka ona ba loron 25 fulan-Outubru.
Flávio Bolsonaro
Iha konferénsia imprensa ida hafoin anúnsiu rezultadu sira, kandidatu prezidensiál hatete katak rezultadu hatudu katak “Brazil hakarak mudansa.”
“Ne’e maka ha’u-nia leitura kona-ba saida maka akontese ohin. Ha’u kontente tebes ho rezultadu sira iha rejiaun hotu-hotu. Kuaze millaun 56 brazileiru sira—mane no feto sira—fó sira-nia votu konfiansa nian iha mudansa. Ha’u kontente tebes ho númeru brazileiru sira ne’ebé maka ba vota, ne’ebé maka la hela iha uma, no ne’ebé maka hakarak mudansa ida-ne’e,” nia deklara.
“Ha’u haksolok ho posibilidade reál katak, iha semana tolu nia laran, Brazíl sei fó resposta definitiva ida ne’ebé hatudu katak hakarak governu modernu ida ho ministériu menus. Governu ida ne’ebé sei nomeia pelumenus juis Supremu Tribunál na’in-haat ne’ebé sei la tenta interfere iha eleisaun,” nia hatutan tan.
“Ha’u mak kandidatu úniku ne’ebé maka kompromete ona atu hakotu re-eleisaun. Ha’u presiza de’it mandatu ida atu koloka povu brazileiru iha ha’u-nia governu nia fuan, atu nune’e ha’u bele rezolve Brazil nia problema loloos sira. Ha’u hakarak oportunidade atu tau matan ba Brazil, atu tau matan ba povu brazileiru sira.”
Lula
Prezidente Brazil nian no kandidatu ba reeleisaun halo diskursu ida maizumenus tuku 21:40 kalan iha auditóriu ida iha Otél Renaissance, besik Avenida Paulista iha São Paulo.
Lula agradese ba votante sira-nia apoiu no hatete katak nia iha esperansa atu manán iha volta dahuluk. Nia nota katak rezultadu ne’e la espera maibé agora, iha volta daruak, nia sei iha oportunidade atu hatudu ba públiku sé maka kandidatu ne’ebé di’ak liu.
“Ita foin aprende lisaun ida kona-ba demokrasia iha Brazil liuhosi votu hosi povu brazileiru,” nia hatete iha inísiu hosi nia diskursu.
“Ha’u konfesa ba ita-boot katak ha’u konvensidu katak ha’u manán eleisaun iha primeira volta. Maibé ha’u hanoin ona ida-ne’e antes,” nia hatete.
“Maibé ita iha eleisaun, no eleisaun maka momentu lia-loos nian. To’o ona tempu atu hatudu imajen loloos hosi Brazil ohin nian no Brazil ne’ebé ita hakarak. Entaun, hahú aban, ita sei hahú kampaña foun ida”, nia hatutan.
Lula kritika nia adversáriu, senadór Flávio Bolsonaro, no hatete katak eleisaun volta daruak sei permite ezame ida ne’ebé klaru liu kona-ba rekorde kandidatu PL nian.
“Iha parte seluk, ami laiha buat ida maibé inserteza, ho istória ne’ebé marka ho pasadu ne’ebé nakukun. Laiha buat ida ne’ebé hatudu ba futuru ida ne’ebé promisór ba sosiedade brazileiru. Laiha istória pozitivu ba aman ka oan-mane, no ami lahatene saida maka bele mosu kona-ba membru família sira seluk. Ida-ne’e maka rejistu ne’ebé nakukun, ho koneksaun sira ne’ebé la klaru no deskonfiansa sira ne’ebé maka’as tebes milísia sira, krime organizadu, no omisídiu sira iha Rio de Janeiro,” nia hatete.
Fonte: Agência Brasil
