Sosiedade Sivíl koordena Autoridade Vikeke halo preparasaun ba fenómenu El-Nino
VIKEKE, 06 Outubru 2026 (TATOLI)–Ekipa Sosiedade Silvil ne’ebé eziste iha Munisípiu Vikeke hala’o sorumutu ho Prezidente Autoridade Munisípiu (PAM) Vikeke hodi estabelese ekipa task force atu halo preparasaun ba fenómenu El-Nino.
“Iha sorumutu entre sosiedade sivíl no Autoridade Munisípiu Vikeke ne’e, ami sujere atu estabelese ekipa task force hodi halo sosializasaun kona-ba fenómenu El-Nino nian ba ita-nia komunidade iha suku sira iha Munisípiu Vikeke,” Augusto Pinto ba TATOLI, iha Postu Vikeke Vila, Sesta ne’e.
Augusto hatutan rekomendasaun sira-ne’ebé parte sosiedade sivíl aprezenta ne’e, autoridade munisípiu apresia ne’ebé sei hasoru-malu dala ida tan mak foin forma ekipa task force hodi tun ba komunidade halo sosializasaun impaktu sira husi El-Nino.
“Ami mós prezenta ona bá Autoridade Protesaun Sivíl (APC-sigla portugeza). Ami sei sorumutu konjuta entre autoridade lokál no sosiedade sivíl hafoin estabelese ekipa hodi prepara ba El-Nino. Planu ne’ebé ami iha mak ita halo asaun antesipatóriu ba El-Ninu liga ba prevensaun nian ba komunidade. Tan ne’e, ita presiza halo sosializasaun ba komunidade para prepara antes,” nia hato’o.
Tuir predisaun katak fenómeno El-Nino (bailoron naruk) sei akontese iha fulan-Novembru 2026 to’o fulan-Abríl 2027.
Iha fatin hanesan, PAM Vikeke, Prezidente Autoridade Munisípiu Viqueque, Francisco C. S. de G. Soares, haktuir parte Autoridade Munisípiu Vikeke prontu kolabora ba asuntu ne’e.
“Atu halo preparasaun intensiva no alerta ba sosiedade iha baze ho agrikultór sira bele preparadu hasoru impaktu husi El-Nino. El-Nino sei hamosu rai-maran, manas maka’as no bee maran. Ho kondisaun hirak-ne’e sei fó impaktu negativu ba ita ema nian saúde, seguransa alimentár no produsaum setór agrikultura no seluk tan,” nia hato’o.
Entretantu, ekipa sosiedade sivíl Munisípiu Vikeke kompostu husi ajénsia Catholic Relief Services (CRS), ADRA, CARE International, Asosiasaun Foin-sae Hadomi Paz (A-FSHP), Raes Hadomi Timor Oan (RHTO) no Krúz Vermella Timor-Leste (CVTL-sigla portugeza).
Jornalista: Vitorino Lopes da Costa
Editór: Xisto Freitas da Piedade
