AMB ho GJDF sei realiza Kopa PAM iha Baukau
BAUKAU, 07 Outubru 2026 (TATOLI)–Autoridade Munisipál Baukau (AMB) hamutuk ho Grupu Juventude Dezenvolve Futeból (GJDF) sei realiza Kopa Prezidente Autoridade Munisipál (PAM) 2026.
PAM Baukau, Veneranda Eurico Lemos Martins, esplika enkontru referida nu’udár parte koodernasaun hodi atualiza kona-ba progresu preparasaun Kopa PAM 2026 liuliu prosesu rejistrasaun ho objetivu fó espasu ba juventude feto no mane atu hola-parte iha eventu referidu.
“Eventu ne’e marka signifikativu ida oinsá dezenvolve desportu iha Munisípiu Baukau hodi halibur foin-sa’e sira la haree ba rasa ka kór,” PAM Baukau hateten iha salaun Wewé Autoridade Munisipál Vila Nova, Kuarta ne’e.
Eis deputada ne’e hato’o agradese ba Komisaun Organizadora ne’ebé responsável husi GJDF tanba iha hanoin pozitivu hodi organiza atividade desportu KOPA PAM BAUKAU 2026.
Aleinde ne’e, husu atu kontinua halo koordenasaun ho ekipa Administrasaun Munisipál Baukau hodi haree ba seksaun lojístika nian ba preparasaun eventu ne’ebé sei realiza iha loron 16 Outubru.
“Desportu bele promove talentu joven sira-nian. Tanba ne’e, mai hamutuk hanesan Baukau-oan hodi hametin pás no estabilidade, liuliu iha ita-nia rain,” Veneranda Lemos akresenta.
Iha enkontru referida lidera direta husi PAM Baukau ne’ebé partisipa direta husi Koordenadór GJDF, Noél Pinto, Seksaun Inspetór Jogu ba Futeból Onze no Futsál COPA PAM 2026, Sonio Guterres.
Entretantu, Kopa PAM Baukau sei realiza kompetisaun Futeból Onze ne’ebé partisipa husi atleta mane ho totál klube 28, enkuantu feto sei kompete iha futsál ne’ebé partisipa hamutuk klube neen no hetan apoiu fundu husi Ministériu Juventude, Desportu, Arte no Kultura (MJDAC) ho orsamentu $10.600,00.
Jornalista: Natalino Belo
Editór: Xisto Freitas da Piedade
