Bobometo prepara Monumentu Masakre Tumin 1999 hodi prepara ba jerasaun foun
OEKUSI, 07 Outubru 2026 (TATOLI)—Xefe Suku Bobometo, José Caet, hateten sira prepara konstrusaun Monumentu, Igreja no Muzeu hodi prezerva memória vítima Masakre Tumin ba jerasaun foun.
“Restu mortál vítima sira agora rai temporariamente iha sede suku, tanba sei iha hela konstrusaun ba monumentu,” José Caet dehan iha Sede Suku Bobometo, Kuarta ne’e.
Nia haktuir Masakre Tumin akontese iha loron 8-9 Setembru 1999, ne’ebé vítima sira mate iha área referida.
“Totál vítima ne’ebé mate iha akontesimentu ne’e hamutuk ema 82, no restu mortál sira husi vítima hirak-ne’e konservada hela iha sede suku,” nia informa.
José esplika infraestrutura ne’e sei kompleta ho rate no moru protesaun, atu sai fatin memória istórika ba jerasaun sira tuirmai.
Antes ne’e, Diretór Servisu Rejionál Obra Públika RAEOA, Remígio Nunu Sila, esplika projetu ne’e nu’udár planu mestre pluri-anuál.
“Ita kontinua ezekuta konstrusaun Masakre Tumin, ho kategoria konstrusaun foun tinan 2026 nian, tanba Serbisu Rejionál Obra Públika Oekusi, prepara ona nia dezeñu, master-plan. Signifika projetu ne’e pluri-anuál. Kada tinan aloka orsamentu atu finaliza konstrusaun ne’e, nu’udár fatin istória no valór ba Estadu, tanba ne’e autoridade tenke tau importánsia hodi implementa,” nia informa.
Tuir nia, planu tenke finaliza iha tinan ne’e, bazeia nia durasaun tempu ne’ebé determina ona—faze dahuluk konstrui kapela no jardín.
“Projetu ne’e hanesan fatin destinu ba futuru—sai fatin dignu nu’udar turizmu, nune’e bele hetan vizitante tantu rai-laran no rai-li’ur, hodi kontribui reseita ba kofre Estadu,” nia hateten.
Entretantu, projetu ne’e implementa husi Empreza Kefi-Oel Unipessoal, Lda, ho valór kontratu $139.393,45 ho durasaun servisu fulan neen.
Jornalista: Felicidade Ximenes
Editór: Xisto Freitas da Piedade
