Governu halo análize kona-ba akordu promosaun no protesaun ba investimentu entre Timor-Leste no Indonézia
DILI, 07 Outubru 2027 (TATOLI) – Governu halo análize ba aprezentasaun preliminár kona-ba akordu entre Governu Timor-Leste no Indonézia kona-ba promosaun no protesaun ba investimentu.
Objetivu husi akordu ne’e atu kria kondisan ne’ebé favoravel liu ba investimentu entre nasaun rua ne’e, liuhusi kuadru protesaun nian ida no tratamentu investimentu, fasilitasaun ba prosedimentu no mekanizmu atu rezolve litíjiu sira ne’ebé bele mosu.
Tanba ne’e, instrumentu ne’e buka atu reforsa konfiansa investidór sira nian, promove fluksu kapitál no teknolojia, no mós kontribui ba dezenvolvimentu ekonómiku no hametin kooperasaun bilaterál.
Vise-Ministru ba Asuntu Parlamentár, Adérito Hugo, esplika katak Governu halo análize preliminár ba akordu ne’e iha tempu badak no Ministru Koordenadór ba Asuntu Ekonómiku, Francisco Kalbuadi Lay, sei halo vizita bá Jakarta, Indonézia, tanba kontaktu lubuk ida parte Governu Timor-Leste no Indonézia nian halo ona atu transforma futuru kooperasaun sira iha setór ekonómiku nia investimentu.
“Hanesan hothotu hatene ita-nia relasaun bilaterál ho Indonézia forte tebes, entaun ita halo jestaun ba ita-nia fronteira terrestre, marítima ne’ebé ita liga direta bá Indonézia”, Adérito Hugo hatete.
Tuir nia, durante tinan barak nia laran koordenasaun entre nasaun rua ne’e la’o di’ak, entaun hanesan nasaun viziña ne’ebé ho fronteira terrestre no marítima direta ne’e presiza tebes transforma kooperasaun sira ne’ebé metin ona durante tinan 24 nia laran.
“Iha dokumentu ofisiál troka ba kompromisu ba investimentu nian hodi garante investimentu sira parte Indonézia nian mai ita no ita-nia parte mós bele asesu ba investimentu Indonézia nian iha parte kontestu rejiaun nian. Imi hotu hatene katak Indonézia mós hola parte país membru ASEAN ho populasaun ne’ebé barak liu, iha poténsia tebes ita bele eleva tan ita-nia kooperasaun ne’e iha nivel ida avansada tan ba iha investimentu ninian”, nia konklui.
Jornalista: Arminda Fonseca
Editora: Maria Auxiliadora
