Aumenta númeru seguransa kontrola másima fronteira – Autoridade Lokál Pássabe propoin
OEKUSI, 08 Outubru 2026 (TATOLI) – Xefe Suku Abani iha sub-rejiaun Pássabe Rejiaun Administrativa Espesiál Oekusi Ambeno (RAEOA), rekomenda ba Governu liuhusi Ministériu Interiór (MI) atu aumenta númeru efetivu, seguransa Polísia Unidade Patrullamentu Fronteira (UPF), nune’e bele kontrola másima liña fronteira sira hodi prevene sasán kontra bandu ne’ebé tama ho ilegalmente mai rai-laran.
Xefe Suku Abani, Carlos Elo, hateten katak suku Abani, nu’udar suku fronteira besikliu nasaun viziña, tanba estrada mak fahe, ho to’os besikliu malu, no lian ida de’it maka lian Baikeno, nune’e afeta ba seguransa sira iha liña fronteira atu kontrola ho másimu.
“Ne’ebé, liuhusi atividade Mídia Tour ne’e, ami rekomenda seguransa tenke aumenta, tanba realidade ita haree seguransa iha parte sorin númeru efetivu kuaze na’in-100, maibé ita-nia UPF sira-ne’e, na’in-haat balun na’in-tolu de’it, ho distánsia área kontrola ne’e besik kilometru 50-resin tanba luan tebtebes, entaun difikulta ita-nia seguransa sira atu kontrola ho di’ak,” nia hateten perante diálogu ho jornalista sira iha sede suku Abani, foin lalais ne’e.
Ho situasaun ne’e, Autoridade lokál ne’e, sente preokupa tanba impaktu ba sasán kontra-bandu bandu bele tama livre liliu moras fasil asesu liuhusi dalan ilegál.
“Ami hakarak onestu de’it katak, iha Pássabe buah maran ne’e, kuandu tama ita la kontrola no lahatene, sé ema tau ida hatama mai mak tau buat ruma, entaun afeta ba ema sira-ne’ebé hela iha suku fronteira ne’e, maibé ida-ne’e la’ós sala husi seguransa UPF sira, tanba ema na’in-tolu de’it maka iha fronteira, kontrola husi Haumeni-Ana to’o postu Kruz, sira labele kobre hotu área luan hanesan ne’e, ida-ne’e maka ami rekomenda karik bele Governu konsidera asuntu ne’e,” nia sujere.
Tanba ne’e autoridade lokál propoin, ba futuru bele destaka ho maximál ema na’in-50 ou 20, nune’e bele fas’il kontrola ho másimu, maibé tau de’it ema na’in-rua rua ka tolu, konserteza sasán kontra-bandu sei tama nafatin mai rai-laran.
Notísia relevante:Presiza reativa ‘Border Pass’ iha liña fronteira –Pe. Paróku rekomenda
Jornalista: Abílio Elo Nini
Editór: Rafael Ximenes de A. Belo
