CMCLN Baukau simu pedidu rua hakarak lori fila restu mortál iha Osoáriu Fatumaka
BAUKAU, 08 Outubru 2026 (TATOLI)–Konsellu Munisipál Kombatente Libertasaun Nasionál (CMCLN-sigla portugeza) Baukau simu pedidu rua husi familia restu mortál iha Osoáriu Fatumaka ho intensaun hakarak haloot iha simtériu privadu.
Sekretáriu Jerál CMCLN Baukau, Roberto Carlos da Costa “Laran Taridu”, esplika prosesu hotu kona-ba mártir iha Osoáriu Fatumaka kompeténsia tomak iha Ministériu Asuntu Kombatente Libertasaun Nasionál (MCLN) iha-ne’ebé tuir informasaun sei haloot fazeadamente tanba antes ne’e eroi husi Munisípiu Baukau haloot ona iha Jardín Eroi Dubuwai, Postu Administrativu Matebian no Daramutu, Postu Administrativu Laga, Munisípiu Baukau.
“Kona-ba saudozu sira-ne’ebé atuál rai-hela iha Osoáriu Fatumaka sei iha prosesu laran tanba Ministériu sei prepara iha Ermera no sei kontinua iha Vikeke,” Sekretáriu Jerál CMCLN Baukau informa ba TATOLI iha ninia kna’ar fatin, Vila Antiga, Baukau, Kinta ne’e.
Laran Taridu relata iha duni ezijénsia husi familia sira hodi husu kona-ba prosesu haloot restu mortál tanba relasiona ho kulturál no durante ne’e iha pedidu rua hanesan husi Suku Bahú, Postu Administrativu Baukau Vila no Vemasse Tasi, Postu Vemasse tanba hakarak lori fila bá haloot tuir lisan.
CMCLN Baukau sei indentifika fali restu mortál iha Osoáriu Fatumaka tanba kuaze kahor hanesan eroi rezisténsia no balun komunidade baibain ne’ebé mate durante luta ba libertasaun nasionál.
“Pedidu ne’ebé mai mak husu hakarak lori fila bá haloot iha simtériu privadu tanba kulturalmente família balun hetan moras,” Laran Taridu subliña.
CMCLN Baukau husu ba komunidade husi família restu mortál atu pasiénsia hodi hein prosesu hotu tanba saudozu sira nu’udár eroi tanba fó-an mate ba libertasaun nasionál nune’e presiza fatin dignu hodi haloot ba.
Entretantu, CMCLN Baukau rasik seidauk hatene numéru restu mortál ne’ebé atualmente iha Osoáriu Fatumaka maibé tuir kalkulasaun hamutuk besik 300 iha-ne’ebé maihusi postu administrativu tolu hanesan Venilale, Vemasse no Postu Baukau Vila.
Jornalista: Natalino Belo
Editór: Xisto Freitas da Piedade
