Edukasaun Kovalima rejista profesór 37 tama lista reforma obrigatóriu iha 2027

KOVALIMA, 08 Outubru 2026 (TATOLI) – Servisu  Munisípiu Edukasaun (SME)  Kovalima husu Ministériu Edukasaun (ME)  atu kontinua koloka profesór foun, tanba tinan 2027 profesór  na’in-37  mak naran  tama iha lista reforma obrigatóriu. 

Diretora Edukasaun Munisípiu Kovalima, Elda de Fatima, relata  situasaun reforma profesór sira ne’e informa ona ba Ministériu Edukasaun hodi prepara substituisaun ba profesór tanba iha 2026, profesór na’in-26 hahú ona reforma no iha tinan oin sei iha tan profesór na’in-37 ne’ebé sei tama iha reforma obrigatóriu.

“Agora ami rekolla hela pedidu husi eskola sira atu hato’o ba nível nasionál. Ami sei menus profesór liu 100 tanba profesór reforma, moras no mate. Maski profesór foun koloka ona antes, nesesidade sei nafatin iha,” Elda de Fatima hateten.

Kolokasaun profesór foun importante atu responde ba nesesidade eskola sira no garante prosesu ensinu-aprendizajen kontinua la’o di’ak.

Iha sorin seluk, Koordenadór Eskola Sekundária Jerál Públika Filial Salele, Daniel Cardoso, hateten katak eskola ne’e sei enfrenta falta profesór tanba profesór permanente ida sei tama iha reforma iha 2027.

“ESGP Filial Salele iha profesór na’in-25, kompostu husi profesór permanente na’in-12 no bolsa kandidatu na’in-13. Iha profesór permanente ida sei reforma iha 2027, no nia hanorin Matemátika ho Portugés,” Daniel Cardoso hateten.

Tanba ne’e, nia husu ba Ministériu Edukasaun atu fó atensaun ba nesesidade profesór iha ESGP Filial Salele, liuliu ba disiplina rua ne’e.

Bazeia ba dadus Servisu Edukasaun Munisípiu Kovalima, totál profesór iha munisípiu ne’e hamutuk na’in-1.037, kompostu husi profesór permanente na’in-887, bolsa kandidatu na’in-131 no profesór kontratadu na’in-19.

Jornalista:Celestina Teles

Editór: Florensio Miranda Ximenes