Konsellu Konsultivu husu Governu hametin disiplina iha jestaun Fundu Petrolíferu
DILI, 08 Outubru 2026 (TATOLI) – Konsellu Konsultivu Fundu Petrolíferu rekomenda ba Governu atu aumenta disiplina no kuidadu iha jestaun Fundu Petrolíferu ho disiplina no garante sustentabilidade fiskál iha futuru.
Ministra Finansa, Santina Cardoso, hatete katak rekomendasaun ne’e importante tanba desizaun ne’ebé halo kona-ba orsamentu iha impaktu direta ka indireta ba Funfu Petrolíferu.
“Desizaun ne’ebé ita halo iha ita-nia orsamentu, direta ka indireta, sei iha impaktu ba ita-nia Fundu Petrolíferu, tanba maioria, ka porsentu 80 hosi finansiamentu OJE mai husi Fundu Petrolíferu”, Ministra Finansa ko’alia iha semináriu internasionál kona-ba jestaun prudente Fundu Petrolíferu, ne’ebe Ministériu Finansa (MF) hamutuk ho Banku Sentrál Timor-Leste (BCTL, sigla portugés) organiza iha Bangkok, Tailándia, tersa-feira ne’e.
Semináriu ne’ebé hala’o durante loron rua ne’e hetan prezensa husi Primeiru-Ministru Xanana Gusmão. Iha loron daruak, diskusaun konsentra ba “Estratéjia Investimentu Fundu Petrolíferu”, inklui jestaun investimentu, risku no rendimentu husi Fundu Petrolíferu.
Santina Cardoso hatete katak Konsellu Konsultivu nia asesoria la’ós de’it atu aprezenta risku sira ne’ebé iha, maibé mós atu fó opsaun kona-ba oinsá Governu bele jere Fundu Petrolíferu ho di’ak liután.
“Ekipa ne’ebé halo asesoria ba Fundu Petrolíferu bele fó sira-nia hanoin hodi alerta ba Governu atu kuidadu no aumenta disiplina liután bainhira hakarak la’o ba sustentabilidade fiskál ida ne’ebé di’ak liu iha futuru”, Santina Cardoso realsa.
Nia salienta katak semináriu ne’e realiza dala-rua kada tinan, ida iha rai-laran no ida iha rai-li’ur, hodi fó oportunidade ba Konsellu Konsultivu atu halo análize no fó rekomendasaun ba Governu.
Iha semináriu iha Bangkok, Timor-Leste mós fahe no aprende esperiénsia ho instituisaun no peritu husi nasaun sira seluk, inklui Tailándia no Bank Negara Malázia.
Péritu sira ne’e fahe esperiénsia kona-ba oinsá sira halo jestaun ba fundu sira-ne’e. Ida-ne’e importante ba ita hodi hasa’e ita-nia kapasidade interna Banku Sentrál no ekipa Ministériu Finansa atu aprende oinsá jere fundu sira seluk iha nasaun sira seluk”, nia subliña.
Aleinde estratéjia investimentu, Konsellu Konsultivu mós fó análize lala’ok investimentu Fundu Petrolíferu, despeza públika anuál no impaktu hosi implementasaun orsamentu ba rendimentu Fundu Petrolíferu.
Ministériu Finansa mós kontinua halo estudu no atualiza modelu ekonómiku hodi ajuda Governu iha prosesu preparasaun no implementasaun Orsamentu Jerál Estadu (OJE).
Governu mós hakarak asegura katak utilizasaun hosi Fundu Petrolíferu bele ajuda investimentu iha setór produtivu sira, hodi diversifika ekonomia no redús dependénsia ba Fundu Petrolíferu.
Fundu Petrolíferu tenke jere ho kuidadu atu asegura benefísiu ba jerasaun atuál no jerasaun sira tuirmai, inklui prepara Timor-Leste atu enfrenta nesesidade finanseira bainhira reseita foun husi kampu petrolíferu sira seluk disponivel iha futuru.
Akompaña Primeiru-Minsitru, Xanana Gusmão, iha atividade ne’e m ak Vise-Primeiru-Ministru no Ministru Koordenadór Asuntu Sosiál no Dezenvolvimentu no Abitasaun Komunitária, Mariano Assanami Sabino, Vise-Ministra ba Asuntu ASEAN, Milena Rangel, Embaixadór Timor-Leste, Francisco Tilma Cepeda, no Xefe Gabinete Primeiru-Minsitru, Elizabeth Exposto.
Jornalista: Arminda Fonseca
Editora: Maria Auxiliadora
