Programa Sander Thoenes loke tan oportunidade formasaun ba jornalista timoroan

DILI, 09 Outubru 2026 (TATOLI)–Governu Reinu Olanda oferese dala-ida tan oportunidade ba jornalista timoroan na’in-tolu atu partisipa iha programa formasaun jornalizmu internasionál durante loron-10 iha Olanda iha Abril 2027 liuhusi lote daruak Programa Sander Thoenes ba jornalista sira.

Programa ne’e ho objetivu atu haforsa kapasidade profisionál, independénsia mídia, no abilidade jornalístika hodi hasoru dezafiu sira era dijitál nian.

Programa ne’ebé agora iha ona tinan daruak, hanesan inisiativa ida husi Komunidade Polítika Estranjeiru Indonézia (FPCI), iha kolaborasaun ho Embaixada Reinu Olanda iha Indonézia no RNW Media. Totál jornalista na’in-ualu mak sei hili hodi partisipa iha formasaun ne’e, kompostu husi partisipante na’in-lima husi Indonézia no na’in-tolu husi Timor-Leste.

Embaixadór Olanda ba Indonézia no Timor-Leste, Marc Gerritsen, hateten, programa ne’e fó oportunidade ba jornalista Timor-Leste atu hasa’e sira-nia abilidade profisionál enkuantu harii rede ho jornalista sira husi Olanda no Indonézia.

“Liuhusi programa ne’e, jornalista sira sei halo interasaun ho jornalista sira hosi Olanda no Indonézia, no aprende oinsá hasoru dezafiu foun sira hanesan notísia falsu sira no intelijénsia artifisiál. Sira mós sei aprende oinsá prodús notísia di’ak sira, bele iha forma eskrita, vídeo, ka ba plataforma sira online nian,” Embaixadór Marc Gerritsen hateten iha serimónia abertura iha Otel Palm Spring, Kinta kalan.

Notísia relevante : Sander Thoenes, Mate Ba Lia-Loos 

Tuir nia, dezenvolvimentu teknolojiku sira no mudansa sira iha paizajen mídia nian aprezenta ona dezafiu foun oioin ba jornalizmu, liuliu iha garante ezatidaun informasaun nian no mantein konfiansa públiku nian.

Tanba ne’e, formasaun ne’e la’ós foka de’it ba hadi’a abilidade téknika maibé ho objetivu atu dezenvolve jornalista sira ne’ebé iha abilidade atu hanoin ho krítiku, independente, no ho responsabilidade hodi hala’o sira-nia profisaun.

“Ami hein katak programa ne’e bele ajuda no enkoraja jornalista sira atu sai independente. Jornalista ida bele serbisu ba organizasaun mídia ida, maibé independénsia signifika mós iha kapasidade atu hanoin ho krítiku no sempre husu pergunta: informasaun ne’e loos ka lae, saida maka akontese duni, no ida-ne’e maka lia-loos?” nia esplika.

Embaixadór Marc subliña katak abilidade hanoin krítiku nu’udar prinsípiu importante ida iha profisaun jornalizmu nian tanba permite jornalista sira atu verifika, kestiona informasaun, no deskobre faktu sira ho objetivu.

Nia espera esperiénsia ne’ebé partisipante sira hetan sei fó impaktu ba tempu naruk ba jornalista sira nia dezenvolvimentu kareira, kualidade reportajen, no hametin knaar mídia nian iha sosiedade Timor-Leste.

“Mídia hanesan krusiál ba sosiedade ida ne’ebé funsiona ho di’ak. Ita presiza lia-loos, abertura, transparénsia, no jornalista sira ne’ebé iha kapasidade atu deskobre faktu sira. Ne’e maka impaktu ba tempu naruk ne’ebé ita hein atu hetan,” nia subliña.

Aleinde ne’e, hasa’e kapasidade profisionál, programa ne’e mós hein atu habelar rede kolaborativa entre jornalista sira husi Timor-Leste, Indonézia, Sudeste Aziátiku, no Olanda.

Tuir Embaixadór Marc, rede ida ne’e bele fornese plataforma hodi troka esperiénsia, fahe koñesimentu, no loke oportunidade ba kolaborasaun no dezenvolvimentu kareira ba partisipante sira hafoin remata formasaun.

Iha biban hanesan, Antónia Martins, jornalista timoroan ida hosi mídia online lian-portugés Diligente, partisipante ida hosi koorte dahuluk, rekoñese esperiénsia folin-boot ne’ebé nia hetan durante formasaun iha Olanda iha Fevereiru 2026.

Antónia hateten, katak programa ne’e fó oportunidade atu aprende aprosimasaun foun oioin kona-ba jornalizmu, inklui téknika investigasaun no utilizasaun intelijénsia artifisiál iha serbisu mídia nian.

“Ha’u sente sorte tebes tanba hetan selesaun hodi halo parte iha programa ne’e ba dala uluk no hetan oportunidade hodi vizita Olanda iha Fulan-Fevereiru liubá. Ami aprende buat barak, inklui jornalizmu investigativu, IA, no tema oioin seluk,” Antónia hateten iha lansamentu husi lote daruak husi programa.

Nia mós fó sai katak esperiénsia ida ne’ebé memorável liu durante nia tempu iha Olanda maka oportunidade hodi hasoru família matebian Sander Thoenes, jornalista olandés ne’ebé nia naran imortaliza iha programa.

Ba ita-boot sira nia informasaun, husi loron 2 to’o 10 Fevereiru 2026, jornalista na’in-haat husi Indonézia no Timor-Leste partisipa iha programa formasaun dahuluk iha Olanda.

Formasaun ne’e kobre tópiku oioin, hanesan kombate dezinformasaun, utiliza Intelejénsia Artifisiál iha jornalizmu, hametin abilidade hanoin krítiku, abilidade relatóriu, no estratéjia sira hodi hasa’e envolvimentu audiénsia nian.

Programa Sander Thoenes ba jornalista sira estabelese hodi komemora moris no legadu husi Sander Thoenes, jornalista olandés ida ne’ebé mate bainhira halo kobertura kona-ba konflitu iha Timor-Leste iha tinan 1999.

Programa ne’e fó onra ba ninia dedikasaun ba liberdade imprensa, ninia korajen hodi buka lia-loos, no importánsia husi prátika jornalístika étika no responsavel. Liuhusi programa ida-ne’e, organizadór sira haka’as-an atu fó apoiu ba jornalista sira hosi Indonézia no Timor-Leste ne’ebé iha kompromisu atu halo reportajen ne’ebé independente, brani, no iha impaktu.

Programa formasaun loron-10 iha Olanda iha meadu Abríl 2027 dezeña atu hadi’a abilidade reportajen, aprofunda partisipante sira-nia komprensaun kona-ba prátika mídia internasionál, no hametin kolaborasaun jornalístika transfronteirisu.

Rejistu ba admisaun daruak programa nian loke hosi loron 8 Outubru to’o 20 Novembru 2026, ho loron ikus ba aplikasaun iha tuku 10:00 PM Oras Indonézia Osidentál (WIB), ka tuku 12:00 dadeer oras Timor-Leste iha loron 21 Novembru 2026.

Programa ne’e nakloke ba sidadaun Timor-Leste no Indonézia ho pelumenus esperiénsia jornalizmu tinan rua, tantu iha imprensa, online, televizaun, ka rádiu, no fluénsia iha Inglés eskrita no ko’alia.

Organizadór sira la estabelese limite idade ba partisipante potensiál sira enkuantu sira prienxe rekizitu esperiénsia profisionál ne’ebé espesifika ona.

Aplikante sira tenke hatama Curriculum Vitae (CV) iha formatu PDF, inklui sira nia títulu serbisu atuál, afiliasaun ba mídia, no sumáriu ida kona-ba sira nia esperiénsia jornalizmu nian.

Aleinde ne’e, aplikante sira tenke hatama vídeo ida ho lian Inglés ho minutu haat iha formatu MP4 ka MOV, hatudu ezemplu sira hosi serbisu jornalístiku relevante no esplika sira nia motivasaun no koñesimentu ne’ebé sira hein atu hetan liuhosi programa.

Dokumentu sira seluk inklui kópia ida hosi ita-boot nia kartaun identidade nasionál, ezemplu sira hosi serbisu jornalístiku ne’ebé publika ona, inklui artigu sira no relatóriu sira iha vídeo, no konfirmasaun hosi ita-boot nia vontade atu partisipa iha formasaun loron 10 nian iha Olanda.

Pasajen aviaun, akomodasaun, no gastu per diem hotu-hotu ba partisipante na’in ualu ne’ebé maka hili sei kobre hosi Ministériu Negósiu Estranjeiru Olanda nian.

Tuir oráriu organizadór sira nian, prosesu selesaun administrativu no lista badak ba partisipante potensiál sira sei hala’o iha loron 23 Novembru to’o loron 06 Dezembru 2026, ho selesaun finál ne’ebé marka ona ba loron 07 to’o 13 Dezembru 2026.

Partisipante sira ne’ebé maka selesionadu sei fó sai iha loron 14 to’o 20 Dezembru 2026, liuhosi kanál komunikasaun ofisiál sira FPCInian no Embaixada Olanda nian.

Jornalista timoroan sira ne’ebé iha interrese bele rejistu liuhosi sítiu ofisiál Sander Thoenes 2026 nian. Ba informasaun liután, kontaktu sekretariadu FPCI iha cindy@fpcindonesia.org.

Sesaun formasaun daruak marka ona ba meadu Abríl 2027, ho data sira ne’ebé bele muda depende ba organizadór sira nia desizaun.

Jornalista     : Hortêncio Sanchez

Editora          : Julia Chatarina