AMB no Ajénsia TATOLI planeia realiza Programa TATOLI Hakbesik iha Baukau

BAUKAU, 09 Outubru 2026 (TATOLI)—Ajénsia Notisioza Timor-Leste, Institutu Públiku (TATOLI, I.P.) hamutuk ho Autoridade Munisipál Baukau (AMB), Sesta ne’e, hala’o enkontru koodernasaun hodi realiza Programa TATOLI Hakbesik iha 27 Outubru iha Munisípiu Baukau.

Vise-Prezidente Asuntu Administrasaun no Finansa TATOLI, I.P., Madalena Pereira Carlos, esplika TATOLI Hakbesik nu’udár parte programa anúal ne’ebé lori entidade husi nasionál no munisipál atu hakbesik informasaun kona-ba podér lokál no desentralizasaun administrativa ba povu inklui sei hala’o diálogu, entervista eskluziva no talkshow ho fonte kredivel sira.

“AMB despozita hakarak apoia no ita servisu ho AMB nu’udár uma-na’in hodi envolve munisípiu seluk hanesan Manatutu, Vikeke no Lautein,” Madalena Carlos informa iha Administrasaun Munisipál Vila Nova.

Madalena Carlos relata desizaun Konsellu Diretiva liuhusi departamentu redasaun no administrativa hili Baukau tanba konsideradu nu’udár sidade daruak no preparadu hasoru polítika autonomia administrativa.

Aleinde ne’e, TATOLI Hakbesik ho objetivu prinsipál atu promove identidade munisípiu hanesan fraternidade umana, sosiál, kulturál, infraestrutura, ekonomia, edukasaun, turizmu no seluk tan liuhusi plataforma informasaun iha TATOLI.

“Hein katak ita-nia preparasaun semana-ne’e bá-oin maka’as liután tanba sei partisipa husi Primeiru Ministru no Prezidente Repúblika,” Madalena Carlos akresenta.

Asesór Prinsipál Autoridade Munisipál Baukau (AMB), João Coimbra, lori AMB apresia TATOLI, I.P. ne’ebé hili Baukau hodi realiza programa TATOLI Hakbesik tanba administrativamente iha ona faze avaliasaun ba implementasaun podér lokál ne’ebé tuir planu sei fazeadamente iha 2027.

“TATOLI nia prezensa ho atividade ne’ebé ohin diskute ajuda tebes AMB iha aspetu divulgasaun informasaun ba komunidade hodi hatene prosesu dezenvolvimentu iha Baukau,” Coimbra hateten.

Coimbra kompromete sei koopera ho TATOLI atu fó susesu ba atividade ne’ebé planeia ona. Tuir ajenda ne’ebé iha, sei realiza diálogu no talkshow durante loron tolu (27-29 Outubru 2026).

Entretantu, TATOLI Hakbesik antes ne’e, realiza ona iha Postu Administrativu Maubesi, Munisípiu Ainaru no Rejiaun Administrativa Espesiál Oekusi Ambeno (RAEOA).

Jornalista: Natalino Belo

Editór: Xisto Freitas da Piedade