Governu haloot ona restu mortál 2.000-resin no kontinua konstrui Jardín Eroi iha 2027
DILI, 09 Outubru 2026 (TATOLI)—Sekretáriu Estadu Veteranu, Cásar dos Santos da Silva “Merak”, informa Governu kontinua ho programa halibur restu mortál hosi mártir iha munisípiu sira iha Ainaru, Manatuto, Natarbora, Lospalos no Iliomar inklui planeia atu kontinua konstrui Jardín Eroi iha 2027.
To’o agora haloot ona restu mortál sira hamutuk 2.000-resin ona, inklui restu mortál 1.600 iha Ermera, ne’ebé realiza iha 28-29 Juñu 2026.
Nia esplika katak Governu antes planeia atu kontinua programa ne’e iha munisípiu seluk, inklui Ainaru, maibé la konsege realiza iha tinan-ne’e tanba atrazu hosi kompañia konstrutora sira.
“Iha Ainaru, restu mortál ne’ebé planeia atu halibur hamutuk 2.661, enkuantu iha Natarbora hamutuk 1.700 no iha Maliana 935. Ida-ne’e ita planu haloot iha tinan oin,” Merak dehan ba TATOLI, iha nia kna’ar fatin, Kaikoli, Dili, Kinta ne’e.
Responsável ne’e mós subliña iha prosesu halibur restu mortál sira, família sira tenke envolve no koopera atu fasilita prosesu ne’e, inklui verifikasaun no serimónia.
Kona-ba konstrusaun Jardín Eroi, nia esplika katak iha fatin balun obra seidauk bele kontinua tanba disputa rai entre komunidade no entidade relevante, ne’ebé lori ona bá tribunál.
Iha Suai, Munisípiu Kovalima, konstrusaun suspende hela tanba disputa kona-ba propriedade rai. Maski iha esforsu atu prepara terrenu, impedimentu ne’ebé mosu no prosesu tribunál nian halo obra ne’e labele kontinua.
Iha Munisípiu Ainaru, preparasaun terrenu no infraestrutura balun, inklui drenajen kontinua ona, no Governu planeia atu kontinua programa ne’e iha 2027.
Nia mós temi katak, iha Manatutu, Natarbora nian, Lospalos no Iliomar, programa ne’e tama iha planu atu kontinua no realiza iha 2027.
Jornalista: Osória Marques
Editór: Xisto Freitas da Piedade
