Governu kontinua prosesu konstrusaun abitasaun ba veteranu

DILI, 09 Outubru 2026 (TATOLI)–Sekretáriu Estadu Veteranu, César dos Santos da Silva “Merak”, informa Governu kontinua prosesu konstrusaun abitasaun ba veteranu iha balun ne’ebé konklui no entrega ona.

Governante ne’e hateten katak, to’o agora, prosesu konstrusaun kontinuasaun abitasaun iha Munisípiu Lospalos, Baukau, Likisá, Ermera no Vikeke.

Nia aumenta katak implementasaun programa ne’e depende ba polítika no orientasaun Governu, enkuantu entidade relevante kontinua halo supervizaun ba prosesu implementasaun, tanba ne’e programa VIII Governu Konstitusionál nian.

Nia haktuir programa ne’e Governu Daualu mak aloka osan $40.000 ba kada veteranu sira tuir kritériu programa ne’e. Implementasaun ne’e bazeia ba Dekretu Governu Númeru 16/20 no Dekretu Númeru 90/2022 no apoiu finanseiru abitasionál ba kombatente no veteranu ne’ebé dezmobilizadu husi 20 to’o 24 tinan luta.

Benefisiáriu ba apoiu abitasaun hosi faze dahuluk to’o daneen hamutuk 248 kompostu hosi Munisípiu Aileu iha na’in-rua (2), Ainaru iha 19, Baukau iha 41, Bobonaru iha ema na’in-ida (1), Dili iha lima (5), Ermera iha haat (4), Likisá iha 11, Lautein iha 97, Manatutu iha hitu (7), Manufahi iha tolu (3), Vikeke 58.

Jornalista: Osória Marques

Editór: Xisto Freitas da Piedade